Nanded News : जिल्हा परिषदेतच पाणीटंचाई!

Nanded : नांदेड जिल्हा परिषदेत मागील दहा दिवसांपासून पाण्याचा ठणठणाट आहे. कर्मचाऱ्यांसोबतच अभ्यांगतानाही तोंड द्यावे लागत आहे. स्वच्छतागृहात पाणी नसल्याने सर्वत्र दुर्गंधी पसरली होती. दरम्यान, मह‍िला कर्मचाऱ्यांच्या रेट्यानंतर प्रशासनाने दोन दिवसांपासून टँकर सुरू केले आहेत.

मागील पंधरा दिवसांपूर्वी नांदेड शहरवासीयांचे कृत्रिम टंचाईने तोंडचे पाणी पाळले होते. आता काही प्रमाणात पाणीपुरवठा सुरळीत होत असल्याचे चित्र आहे. एकिकडे उन्हाचा पारा वाढत असताना शहरासह जिल्‍ह्यात अनेक ठिकाणी भिषण टंचाई आहे.

आता यात जिल्हा परिषदही मागे राहिली नसून मागील दहा दिवसापासून बोअर अटल्याने टंचाईचे सावट निर्माण झाले आहे. जिल्हा परिषदेत कामासाठी शहरासह जिल्हाभरातून येणाऱ्यांची संख्या अधिक आहे. त्यामुळे या टंचाईला कर्मचाऱ्यांसोबतच अभ्यांगतानाही तोंड द्यावे लागत आहे.

स्वच्छतागृहात पाणी नसल्याने सर्वत्र दुर्गंध येत होती. पाणी नसल्याने शेवटी स्वच्छतागृहांना कुलूप लावण्यात आले, अशी विदारक परिस्थ‍िती निर्माण झाली होती. विशेष म्हणजे महिला कर्मचाऱ्यांना कठिण जात होते. महिला कर्मचाऱ्यांनी पुढाकार घेऊन प्रशानाकडे उपाय योजना करण्याची मागणी केली. त्यांच्या रेट्यानंतरच प्रशासनाने दोन द‍िवसांपासून दोन टँकरने पाणी सुरू केले आहे.

कूलरमध्ये पाणी अन् स्वच्छतागृहाला कुलूप

या भीषण टंचाईतही प्रत्येक विभागात कुलर लावण्यात आले आहेत. एकिकडे स्वच्छतागृहाला पाण्याअभावी कुलूप तर, दुसरीकडे कुलरमध्ये पाणी टाकण्यात येत आहे, त्यामुळे कार्यालयात येणाऱ्या अभ्यांगतामधून संताप व्यक्त होत आहे.