नांदेडच्या ‘या’ बँकेची निवडणूक पुढे ढकलली

नांदेड : सध्या संबंध जगभरात कोरोना या विषाणूने थमान घातले आहे. त्याचा फटका सर्वत्र बसला असून देशातील उद्योगधंदे व काराखाने बंद पडले आहेत. अनेकांचे रोजगार गेल्याने देशाची आर्थीक स्थिती डघाईस आली आहे. या पार्श्वभूमीवर राज्यातील मुदत संपलेल्या सहकारी संस्थांच्या निवडणुकांना अगोदर तीन महिन्यांची मुदतवाढ दिली होती. आता तर पूर्वीपेक्षा जास्त कोरणा रुग्ण वाढले असल्याने दुसऱ्यांदा पुन्हा तीन महिन्यांची मुदतवाढ दिली आहे. त्यामुळे नांदेड जिल्हा मध्यवर्ती बँकेचे जिल्ह्यातील मुदत संपलेल्या सर्व सहकारी संस्थांची सार्वजनिक निवडणूक तीन महिने पुढे ढकलली आहे.

जिल्हा बँकेच्या संचालक मंडळाची मुदत संपण्या अगोदर स्थानिक स्तरावर मतदार नोंदणी यादी तयार करण्याचे काम हाती घेण्यात आले होते. ही प्रक्रिया सुरू असताना राज्य व देशावर कोरोना संक्रमणाचे ढग जमू लागले. त्यामुळे हातातली सर्व कामे सोडून प्रशासन कोरोना प्रतिबंधाच्या उपाययोजनेत लागले आहे. लॉकडाऊनमुळे पहिल्या दोन टप्प्यात सहकारी संस्थांची कार्यालये शटडाऊन करण्यात आली होती. यामुळे या कालावधीत मुदत संपणाऱ्या सहकारी संस्थांची निवडणूक कशी घ्यावी असा प्रश्न उपस्थित झाला. मग राज्य सरकारने याबाबत घेतलेल्या एका निर्णयाने निर्माण झालेला संभ्रम दूर झाला.

हेही वाचा - तो’ तांदूळ सरकारी वितरणाचाच- गुन्हा दाखल

१९६० मधील कलम ७३ मधील तरतुदीनुसार प्राप्त अधिकाराचा वापर

सहकारी संस्थांच्या विद्यमान संस्था संचालक मंडळाला तीन महिन्यांची मुदतवाढ देण्यात आली. महाराष्ट्र सहकारी संस्था अधिनियम १९६० मधील कलम ७३ मधील तरतुदीनुसार प्राप्त अधिकाराचा वापर करून शासनाने उपरोक्त निर्णय घेतला आहे. यामुळे कोरोना संक्रमणाचा धोका लक्षात घेता निवडणूक पुढे ढकलल्याने राजकारण्यांना दिलासा मिळाला आहे. आता लॉकडाऊन काही प्रमाणात शिथिल करण्यात आला असला तरी संक्रमणाचा धोका वाढला आहे. रुग्णांची संख्या दिवसेंदिवस वाढत आहे ही परिस्थिती लक्षात घेता राज्य सरकारने मुदत संपणाऱ्या सर्व सहकारी संस्थांना आणखी तीन महिन्यांची मुदतवाढ दिली आहे.

जिल्हा बँकेचे विद्यमान संचालक मंडळाला तीन महिन्यांची मुदतवाढ

ज्या टप्प्यावर निवडणुकीची प्रक्रिया थांबलेली आहे त्याच टप्प्यावर स्थगित ठेवावी असे निर्देश देण्यात आले आहेत. यामुळे नांदेड जिल्हा बँकेचे विद्यमान संचालक मंडळाला तीन महिन्यांची मुदतवाढ मिळाली असून निवडणूक तीन महिने पुढे ढकलण्यात आली आहेत. याशिवाय नांदेड जिल्ह्यातील ज्या सहकारी संस्थांची मुदत संपत आहे अशा सर्व संस्थांच्या निवडणुका ही काही महिने पुढे ढकलण्यात आल्या असल्याचे सुत्रांनी सांगितले.