स्वत: च्या लग्नपत्रिका वाटप करणाऱ्या नवरदेवावर काळाचा घाला; नांदेड- बारड रस्त्यावर अपघातात ठार 

अर्धापूर ( जिल्हा नांदेड ) : विवाह ही प्रत्येकाच्या जीवनातील महत्त्वाची व अविस्मरणीय घटना. यासाठी आपल्या नातेवाईकांना, मित्रपरिवाराला आगृहाचे निमंत्रण दिले जाते. आजही ग्रामीण भागात घरी जाऊन पत्रिका देवून निमंत्रण देण्यात येते. आपल्या विवाहाचे निमंत्रण घेऊन जाणा-या नवरदेवाचा दुचाकीला अपघात होवून त्यात नवरदेवाचा मृत्यू झाल्याची घटना नांदेड- बारड रस्त्यावरील निर्मल जिनिंग फॅक्टरीजवळ गुरुवारी (ता. एक ) रात्री झाली आहे.

अपघातात मृत्यू झालेल्या तरुणाचा बुधवारी (ता. सात) विवाह होणार होता. आपल्या भावी वैवाहिक आयुष्याचे स्वप्न पाहणा-या तरुणाचा बोहल्यावर चढण्याआधीच अर्ध्यावर डाव नियतीने मोडला. या प्रकरणी अर्धापूर पोलिस ठाण्यात अज्ञात वाहन चालकाविरुध्द गुन्हा दाखल झाला आहे.

हेही वाचा - विशेष बातमी ः हाताला काम नाही व पोटाला अन्न नाही कसे जगायचे मायबाप, पालातील कुटुंबाची प्रशासनाला आर्त हाक

याबाबत पोलिस सुत्राकडून मिळालेली माहिती आशी की. उत्तम भुजंगराव शिराने (वय 25) रा. टाकराळा ता. हिमायतनगर हे आपल्या लग्नाच्या पत्रिका वाटप करून नांदेडकडून भोकरफाटा मार्गे बारडकडे जात आसतांना निर्मला काॅटन जिनींग मिलजवळ दुचाकीवरून (एम एच 26 बी यु 8473) जात असतांना अज्ञात वाहन चालकाने सदरील दुचाकीला मागून धडक दिली. यात उत्तम शिराने हे गंभीर जखमी झाल्याने त्यांचा जागीच मृत्यू झाला. सदरील अपघात गुरुवारी रात्री झाला आहे.

या अपघाताप्रकरणी मयताचे वडील भुजंगराव शिराने यांनी दिलेल्या फिर्यादीवरुन अज्ञात वाहन चालकाविरुध्द गुन्हा दाखल झाला आहे.

या अपघातात मृत्यू झालेल्या तरुणाचा विवाह बुधवारी (ता. सात) औद्योगिक वसाहत नांदेड येथे सकाळी साडेअकरा वाजता होणार होता. ते आपल्या विवाहाच्या निमंत्रण पत्रिका वाटप करुन परत जात आसतांना ही दुर्दैवी घटना झाल्याने हळहळ व्यक्त केली जात आहे.

संपादन- प्रल्हाद कांबळे