अनधिकृत मंगल कार्यालयावर पालिकेचा हातोडा चालणार का?

धर्माबाद, (जि. नांदेड) ः शहरात बांधकाम परवानगी नसलेले तसेच आरक्षित जागांमध्येही मंगल कार्यालयाचे बांधकामे झाली आहेत. ही अनधिकृत बांधकामे पाडण्याची कारवाई पूर्णपणे थंडावली होती. कारवाई करण्यास पालिकेने टाळाटाळ केली आहे. या मुळे सदरील बांधकामे पाडण्यात यावी, अशी मागणी जोर धरू लागल्याने गंगासीटी येथील आरक्षित जागेवरील मंगल कार्यालय बांधकामप्रकरणी पुन्हा कारवाई सुरू होणार असल्याचे मुख्याधिकारी मंगेश देवरे यांनी सांगितले आहे. पालिकेच्या कारवाईचा हातोडा खरोखरच चालणार की ‘वरून’ दबाव आल्यानंतर कारवाईला ब्रेक लागणार याकडे धर्माबादवासीयांचे लक्ष लागले आहे.

कार्यालयाला नेमका आशीर्वाद कुणाचा?
मंगल कार्यालयाची किंवा बांधकामाची कोणतीही परवानगी नगरपालिकेकडून न घेता आरक्षित जागेवर मोठ्या प्रमाणात गंगासीटी येथील उच्चभ्रू वस्तीत व्यावसायिक मंगल कार्यालयाचे बांधकाम करून प्रशासनाची खिल्ली उडवली. हे मंगल कार्यालय पाडण्यात यावे, अशी मागणी तीन महिन्यांपूर्वी मुख्याधिकारी मंगेश देवरे यांच्याकडे करण्यात आली होती. सदरील मंगल कार्यालय पाडण्याचा ठराव नगर पालिकेच्या २० सन्माननीय सदस्यांनी घेतला होता. गंगासीटी येथील मंगल कार्यालयाचे अनधिकृत बांधकाम केल्याप्रकरणी पालिकेने पत्राद्वारे धडक कारवाई करण्याचा इशाराही दिला होता. परंतु ही कारवाई गुलदस्त्यात राहिली आहे. अशातच कोरोना संसर्ग महामारीने देशात थैमान घातले आहे. त्यामुळे देश लॉकडाऊन करण्यात आला. कोरोनाच्या पार्श्वभूमीवर मुख्याधिकारी मंगेश देवरे व पालिकेचे कर्मचारी कोरोना संसर्ग रोखण्यासाठी दोन अडीच महिने व्यस्त होते. या मुळे मंगल कार्यालय पाडण्याची कारवाई थंडावली होती. मंगल कार्यालय पाडण्याचा ठराव घेऊन सहा महिने उलटले तरी अद्याप सदरील मंगल कार्यालय पाडण्यात आले नसल्यामुळे या मंगल कार्यालयाला नेमका आशीर्वाद कुणाचा? हा प्रश्न उपस्थित होत आहे.

हेही वाचा - धक्कादायक : ‘झिंगाट’ पतीकडून पत्नी व मुलाचा गळा चिरून खून 

कारवाईला ब्रेक लागणार 
आता हळूहळू बाजारपेठ सुरू झाली असून मंगल कार्यालय पाडण्याची मागणी मुख्याधिकारी देवरे यांच्याकडे पुन्हा जोर धरू लागली आहे. यामुळे आरक्षित जागेवरील मंगल कार्यालय बांधकामप्रकरणी पुन्हा कारवाई सुरू होणार असल्याचे मुख्याधिकारी मंगेश देवरे यांनी सांगितले आहे. त्यामुळे बांधकामधारकाचे धाबे दणाणले असून अनेक धनदांडगे राजकीय लोकांकडे ‘वाऱ्या’ सुरू केल्या आहेत. त्यामुळे मंगल कार्यालयावरील पालिकेच्या कारवाईचा हातोडा खरोखरच चालणार की वरून दबाव आल्यानंतर कारवाईला ब्रेक लागणार याकडे धर्माबादवासीयांचे लक्ष लागले आहे.

बांधकामधारकांच्या तोंडचे पाणी पळणार
शहरातील बाळापूर रस्त्यावर दोन, गंगासीटी येथे एक, हिंदू स्मशानभूमीचा परिसर एक असे एकूण चार मंगल कार्यालयाचे बांधकाम विना परवानगी व आरक्षित जागेवर मोठ्या प्रमाणात करण्यात आलेले आढळून आले असल्याची नोंद पालिकेकडे आहे. या विनापरवाना मंगल कार्यालयावर पालिकेचा हातोडा चालणार असल्याने बांधकामधारकांचे तोंडचे पाणी पळाले आहे.