लातूर : लातूर येथे विमानतळाची स्थिती असून अडचण नसून खोळंबा अशी झाली आहे. तटभिंतीसाठी जमीन संपादनाची कारवाई रखडल्याने येथे विमान उतरवले जाऊ शकत नाहीत. हे लक्षात आल्यानंतर आमदार अभिमन्यू पवार यांच्या पाठपुराव्यातून एमआयडीसीच्या वरिष्ठ अधिकाऱ्यांच्या पथकाने शुक्रवारी (ता.२२) येथे येवून विमानतळाला भेट देवून पाहणी केली आहे. तसेच औशासाठी अतिरिक्त एमआयडीसी केली जाणार आहे. बेलकुंड (ता.औसा) परिसरात उपलब्ध होवू शकणाऱ्या जागेचीही या पथकाने पाहणी केली आहे.
रस्त्याच्या मागणीवरून त्या भागातील शेतकऱ्यांचा जमीन देण्यास विरोध आहे. यावर काही महिन्यापूर्वी वरिष्ठ पातळीवर बैठकही झाली. ही जमीन सक्तीने संपादित करावी असे आदेशही शासनाने दिले आहेत. विमानतळ असल्याने विमानसेवा सुरु व्हावी अशी मागणी आहे. तर दुसरीकडे आता लातूरमध्ये एमआयडीसीत जागा शिल्लक नाही. नवीन एमआयडीसी जागा संपादन करणे अवघड आहे. औसा येथेही जुन्या एमआयडीसीत जागा शिल्लक नाही.
पण औशात अतिरिक्त एमआयडीसी करण्यासाठी जागा उपलब्ध होवू शकते हे आमदार अभिमन्यू पवार यांनी उद्योगमंत्री उदय सामंत यांच्या लक्षात आणून दिले. त्यानंतर त्यांनी एमआयडीसीच्या वरिष्ठ अधिकाऱ्यांना जागेची पाहणी करण्याच्या सूचना केल्या होत्या. यातून शुक्रवारी एमआयडीसीचे उपमुख्य कार्यकारी अधिकारी सोनाली मुळे, महाव्यवस्थापक (भूमि) बप्पासाहेब थोरात यांच्यासह काही अधिकारी शुक्रवारी येथे दाखल झाले.
त्यांनी सुरवातीला बेलकुंड (ता. औसा) येथील जागेची पाहणी केली. त्या परिसरात माळरान जास्त आहे. त्यामुळे तेथे कमी दरात जमीन उपलब्ध होवू शकते. या ठिकाणी २४८ हेक्टर जमीन उपलब्ध आहे. या संदर्भात अधिकाऱ्यांनी आमदार अभिमन्यू पवार यांच्याशी चर्चा केली तसेच सकारात्मकता दाखवली. बेलकुंड परिसरातील जागेची पाहणी करून हे पथक दुपारी येथील विमानतळावर आले. तेथे त्यांनी विमानतळाच्या भूसंपादन करावयाच्या जागेची पाहणी केली. तसेच विमानतळाशी निगडीत कामे करणाऱ्या सूचना त्यांनी येथील एमआयडीसीच्या अधिकाऱ्याना दिल्या.
दरम्यान दुपारनंतर जिल्हाधिकारी वर्षा ठाकूर घुगे यांनी विमानतळाला भेट दिली. तेथे काय काय सुविधा आहेत याची पाहणी करून संबंधीत अधिकाऱ्यांना सूचना दिल्या आहेत. त्यामुळे लवकरच औशाच्या अतिरिक्त एमआयडीसी व येथील विमानतळाच्या भूसंपादनाचा प्रश्न मार्गी लागण्याची शक्यता आहे.
काही जमीन संपादित करण्याची गरज
दरम्यान जिल्हाधिकारी वर्षा ठाकूर घुगे यांनी देखील दुपारी विमानतळाच्या जागेची पाहणी केली आहे. त्यामुळे हे दोनही प्रश्न लवकरच मार्गी लागण्याची शक्यता आहे. लातूर येथे विमानतळ आहे. परंतु या विमानतळाच्या तटभिंतीसाठी काही जमीन संपादित करण्याची गरज आहे. ९.८८ हेक्टर ही जमीन आहे.
विमानतळाच्या तटभिंतीसाठी जागेच्या भूसंपादनाचा विषय आहे. काही दिवसापूर्वीच शेतकऱ्यांची बैठक घेतली आहे. त्याचा प्रस्तावही शासनाला सादर केला जाणार आहे. उद्योगमंत्री उदय सामंत यांच्या सूचनेवरून शुक्रवारी विमानतळाच्या जागेची पाहणी केली. तेथे काय सुविधा आहेत, काय सुविधा द्याव्या लागणार आहेत याची माहिती घेतली. कामाच्या संदर्भात संबंधितांना सूचनाही करण्यात आल्या आहेत.
— वर्षा ठाकूर-घुगे, जिल्हाधिकारी, लातूर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
