आता शिवसेना गप्प का? वानखेडेंसंदर्भात आमदार राणेंची शिवसेनेवर टीका

नांदेड : आता मराठी माणसावर अन्याय होत असताना मराठी माणसाचा पुळका आणणारी शिवसेना गप्प का? हिंमत असेल तर समीर वानखेडेंवर कारवाई करून दाखवा, मग पुढचा कार्यक्रम आम्ही करू, असा इशारा आमदार नितेश राणे यांनी महाविकास आघाडी सरकारला दिला.

देगलूर-बिलोली मतदासरंघाच्या पोटनिवडणूक प्रचारादरम्यान ते रविवारी (ता.२४) देगलूरमध्ये पत्रकारांशी बोलत होते. भाजपने सचिन वाझेंवर कारवाईची मागणी केली तेव्हा ‘तो ओसामा बीन लादेन आहे का’ असा प्रश्न मुख्यमंत्री उद्धव ठाकरे यांनी विधिमंडळात केला होता. आता आम्ही विचारतो, वानखेडे काय दाऊद इब्राहिम आहे का?

तुमचा वानखेडेंवर राग आहे, तर सचिन वाझेवर इतके प्रेम का, तुमचे हप्ते घरी आणून देत होता म्हणून का, असा प्रश्न उपस्थित करून राणेंनी शिवसेनेवर टीका केली. शाहरूख खानकडे इतका पैसा झाला आहे, की खासदार संजय राऊत व नवाब मलिक यांना त्याने भाड्याने घेतले आहे, असा टोलाही राणे यांनी लगावला.

बिलोली तालुक्यात सभा आमदार नितेश राणे यांनी अटकळी (ता.बिलोली) येथे बैठक घेतली. गोपीचंद पडळकर, उमेदवार सुभाष साबणे तसेच डॉ. अजित गोपछडे, सरचिटणीस विजय गंभिरे, धीरज स्वामी, आशिष नेरलकर, डॉ. अमोल ढगे, बाळू लोंढे, राज यादव, अक्षय अमिलकंठवार आदी उपस्थित होते. आमदार राणे यांनी खुशावाडी येथेही सभा घेतली. साबणे यांना विजयी करण्याचे आवाहन त्यांनी केले.