‘झेडपी’ची सर्वसाधारण सभा ऑनलाइनच!

नांदेड : सामज कल्याणअंतर्गत दलित वस्ती नियोजनावरून जिल्हा परिषद (झेडपी) चे राजकीय वातावरण चांगलेच तापले. सत्ताधारी महाविकास आघाडीच्या निर्णयाला विरोध करत भाजपच्या सदस्यांनी सोमवारी (ता.१५) नियोजित ऑनलाइन सर्वसाधारण सभेवर अक्षेप घेतला. दरम्यान, कोरोनाचा धोका लक्षात घेऊन प्रशासनाने पदाधिकाऱ्यांसह सदस्य, पंचायत समिती सभापती, गटविकास अधिकाऱ्यांना ऑनलाइन सर्वसाधारण सभेच्या नोटीस बजावल्या आहेत. 

सोशल डिस्टन्सिंगच्या आंमलबजावणीसाठी सभागृह तोकडे पडत असल्याचे कारण देत प्रशासनाकडून तालुका स्तरावर पंचायत समित्यांमध्ये मिनी कक्ष स्थापन केले आहेत. मुख्यालयामधील सभागृहातून पदाधिकारी, विभागप्रमुख गटस्तरावर जिल्हा परिषद सदस्य, तालुका स्तरावर पंचायत समिती सभापती, गटविकास अधिकारी यांच्याशी संवाद साधणार आहेत. तांत्रिक अडचणींमुळे सदस्यांना पंचायत समिती कार्यालयातून पदाधिकाऱ्यांशी संवाद साधता येणार आहे.

हे ही वाचा -  जिल्ह्यातील उद्योग- व्यवसाय सुरु, पण कामगार काही मिळेना

ऑनलाइन सर्वसाधारण सभेसाठी जिल्हा प्रशासनाने ॲप विकसित करून सदस्य पदाधिकाऱ्यांना ॲपद्वारे प्रश्न विचारता येणार आहेत. नियंत्रण कक्षातील पदधिकारी, विभाग प्रमुख प्राप्त प्रश्नांची उत्तरे, खुलासा सादर करतील. मागील सभेच्या इतिवृत्तासह सभा अहवालही सदस्यांना ॲपद्वारे सभा सुरू होण्यापूर्वी ठराविक वेळेत मिळणार आहे. शासनाच्या विविध योजनांसह ऐनवेळी घ्यावयाच्या निर्णयाबाबत सदस्यांची संमतीही ॲपद्वारे घेतली जाणार आहे. 

जगभरात थैमान घातलेल्या कोरोना महामारीच्या हद्दपारीसाठी ग्रामीण भागात खबरदारीसह उपाययोजनांवर भर देण्यात येत आहे. आरोग्य विभागाच्या मार्गदर्शक सूचनांनुसार गावपातळीवर ग्रामपंचायत कार्यालयांकडून स्वच्छतेच्या उपाययोजना राबविण्यात येत आहेत. नागरिकांच्या आरोग्य सेवेसाठी औषधी खरेदच्या प्रमाणवाढीसह आरोग्य सुविधाचे निर्णयही सभागृहाला घ्यावे लागणार आहेत.  

येथे क्लिक करा - धनदांडग्यांचा मोफत धान्यावर डल्ला.....कुठे ते वाचा

प्रशासनाने शनिवारी ऑनलाइन सर्वसाधारण सभेच्या पार्श्वभूमीवर विभागप्रमुख, गटविकास अधिकाऱ्यांचा आढावा घेतला. जिल्हा परिषद अध्यक्षा मंगाराणी अंबुलगेकर यांच्यासह पदाधिकारी, विभागप्रमुखांना संवाद साधण्यासाठी सभागृहामध्ये नियंत्रण कक्ष स्थापन करण्यात आला आहे. त्यामुळे भाजप सदस्यांचा अक्षेप झुगारून सत्ताधारी महाविकास आघाडीकडून ऑनलाइन सर्वसाधारण सभेची तयारी अंतिम टप्प्यात आली आहे. 

कोरोना महामारीचे गांभीर्य राखून पुणे, औरंगाबाद, परभणी जिल्हा परिषदांनी ऑनलाइन सर्वसाधारण सभा घेतल्या आहेत. विरोधाच्या जागी विरोध असावा, अशा संकटाच्या काळात सर्वांनी एकत्र येण्याची गरज आहे. कोरोनाच्या पार्श्वभूमीवर ऑनलाइन सर्वसाधारण सभेचा निर्णय स्वागतार्ह आहे. त्या अनुषंगाने ऑनलाइन सर्वसाधारण सभेची तयारी अंतिम टप्प्यात आली असून सोमवार होणारी ऑनलाइन सर्वसाधारण सभा सार्वांच्या हिताची ठरणार आहे. 
संजय बेळगे - सभापती अर्थ व शिक्षण जिल्हा परिषद, नांदेड