आता एवढं शिकलं तरच सरपंच हुनार बरं का ?

कोल्हापूर : ‘शिकून कोण सरपंच झालाय,’ ही ग्रामीण भागातील म्हण आता खोटी ठरणार आहे. कारण राज्य निवडणूक आयोगाच्या नियमानुसार, १ जानेवारी १९९५ नंतर जन्म झालेल्या व्यक्तीस; मग ती पुरुष असो किंवा महिला; तिला किमान सातवीपर्यंत शिक्षण असल्याशिवाय सरपंच होता येणार नाही. 

राज्य निवडणूक आयोग राज्यात १४ हजार २३४ ग्रामपंचायतींच्या निवडणुका घेत आहेत. या निवडणुकांमध्ये थेट सरपंच निवडणुकीसाठी २०१८ ला केलेल्या नियमानुसार प्रत्येक सार्वत्रिक निवडणुकीसाठी किंवा पोटनिवडणुकीसाठी उमेदवारी निश्‍चित करताना तो उमेदवार २१ वर्षाहून कमी वयाचा नसावा, त्याचे मतदार यादीत नावे असावे, तसेच १ जानेवारी १९९५ नंतर जन्मलेल्या व्यक्तीने इयत्ता सातवीपर्यंत शालेय शिक्षण घेतल्याशिवाय सरपंच म्हणून निवडणूक लढवता येणार नसल्याचे नमूद केले आहे.

हेही वाचा - चंदगड नगरपंचायतीचे सर्वच अधिकारी रजेवर -

सातवी पासच्या केलेल्या नियमाचे स्वागत होत आहे. दरम्यान, सरपंच निवडही थेट जनतेतून करण्याऐवजी सदस्यांमधूनच केली जाईल, असाही उल्लेख राज्य निवडणूक आयोगाचे उपायुक्त अविनाश सणस यांनी केला आहे.   

१२७९ ईव्हीएमचे वाटप

जिल्ह्यातील ४३३ ग्रामपंचायत मतदानासाठी जिल्ह्यात राखीवसह ४ हजार ९२० ईव्हीएम मशिनचे नियोजन केले आहे. त्यापैकी आज जिल्ह्यातील सहा तालुक्‍यांसाठी १ हजार २७९ ईव्हीएम मशिनचे वाटप करण्यात आले. उर्वरित मशिनचे दोन दिवसांत वाटप केले जाणार आहे. जिल्ह्यातील निवडणूक होणार असलेल्या ग्रामपंचायतींसाठी ईव्हीएम मशिन वाटप करुन शिल्लक राहिलेली मशिन राखीव म्हणून ठेवली जातील.

ग्रामपंचायत निवडणूकीमध्ये कोणताही कसूर राहू नये यासाठी जिल्हा प्रशासनानेही काळजीपूर्वक गती घेतली आहे. जिल्ह्यात ४३३ ग्रामपंचायतींसाठी १७८० मतदान केंद्रांवर मतदान होत आहे. यासाठी १९७७ कंट्रोल युनिट व २९४३ बॅलेट युनिट (मतदान मशिन) असे एकूण ४९२० ईव्हीएम मशिनचे नियोजन केले आहे. 

हेही वाचा - अस फक्त आमच्या कोल्हापुरात घडत: म्हशी चालल्या पार्लरला -

संपादन - स्नेहल कदम