बंदी असताना शिक्षकांनीच केला अतिसंवेदनशील क्षेत्रात प्रवेश

राशिवडे बुद्रुक (कोल्हापूर) : राधानगरी अभयारण्याच्या अत्यंत संवेदनशील परिसरात कोल्हापूर येथील काही शिक्षक मंडळींनी शनिवारी (ता. २१) रात्री शिरकाव केला. अवैधरीत्या प्रवेश केल्याबद्दल त्यांच्यावर दंडात्मक कारवाई करण्यात आली आहे; तर त्यांना घेऊन जाणाऱ्या वनरक्षकाला कायदेशीर नोटीस पाठवण्यात आली.

अभयारण्याच्या परिसरातील दाजीपूरपासूनचा उत्तरेकडील भाग हा पर्यटकांसाठी राखीव ठेवण्यात आला आहे. मात्र, दक्षिणेकडील काळम्मावाडी धरण परिसराचा पूर्ण भाग अतिसंवेदनशील म्हणून राखीव आहे. यात कुणालाही प्रवेश नाही. मात्र, शनिवारी (ता. २१) सतीचा माळ येथील सुरंगी गेटपासून आत कोल्हापूर येथील एका पेठेतील काही शिक्षक गाड्या घेऊन नानीवळे वन्यजीव कुटीपर्यंत गेले. ही माहिती स्थानिकांकडून समजल्यावर त्यांनी तातडीने सर्वांना ताब्यात घेतले व दाजीपूर येथील वनक्षेत्रपाल नामदेव पाटील यांच्याकडे सुपूर्द केले. या सर्व लोकांवर नियमभंगाची कारवाई म्हणून दंडात्मक कारवाई करण्यात आली आहे; तर रक्षकावर कारवाई करण्याचे काम सुरू असल्याची माहिती विभागीय अधिकारी विशाल माळी यांनी दिली.

हेही  वाचा- भाडोत्री गाड्यांवर कर्ज काढणारे रॅकेट उघड

दरम्यान, या सर्व शिक्षकांनी येथील मंदिर परिसराची स्वच्छता मोहीम दुपारी केली असल्याची माहिती दाजीपूर येथील वनक्षेत्रपाल श्री. पाटील यांनी दिली. परंतु, अतिसंवेदनशील क्षेत्रात प्रवेश करणे हा गुन्हा असल्याने ही नियमभंगाची कारवाई केली आहे.

संपादन- अर्चना बनगे