"कुटं बी थुकतोस मर्दा, कोरोना करेल समद्यांचा खुर्दा' कोल्हापूर जिल्हा प्रशासनाची जनजागृती

कोल्हापूर : कोरोना महामारीच्या काळात सार्वजनिक ठिकाणी थुंकत सामाजिक आरोग्य धोक्‍यात आणणाऱ्या व्यक्तींवर प्रशासनाने गेल्या काही दिवसांपासून कारवाईचा बगडा उचलला आहे. थुंकणाऱ्यांवर कारवाई करण्यासोबत त्यांचे प्रबोधनही करण्यासाठी महापालिका व जिल्हा प्रशासनान विशेष प्रयत्न करत आहे. 
लॉकडाउन शिथिल झाल्यानंतर जिल्ह्यासह शहरात कोरोना बाधितांची संख्या वाढू लागली. लोक बाहेर पडल्याने समूह संसर्गाचा धोका निर्माण झाला. यातच धूम्रपान करत सार्वजनिक ठिकाणी थुंकणाऱ्यांची संख्याही वाढली. ही घातक कृती टाळण्याच्या बद्दल प्रशासनाच्या सूचनेकडे नागरिकांनी दुर्लक्ष केले. याकडे "सकाळ'ने ग्राऊंड रिपोर्ट करत "पिचकारी नव्हे, तर कोरोनाचे स्फोटकच' या शीर्षकाखाली प्रकाशझोत टाकण्याचा प्रयत्न केला. प्रशासन सध्या नागरिकांवर दंडात्मक कारवाईसह विविध माध्यमांतून त्यांचे प्रबोधन करत आहेत. 

सोशल मीडियाद्वारे प्रबोधन 
"कुटंबी थुकतोस मर्दा, कोरोना करेल समद्यांचा खुर्दा'... "का म्हणून थुंकायचं? स्वतःसोबत दुसऱ्याचे आरोग्य धोक्‍यात आणायचं... असे मार्मिक संदेश तयार करून फेसबुक, हॉट्‌स ऍप या सोशल मीडियाच्या माध्यमातून प्रशासनाकडून व्हायरल करत नागरिकांमध्ये जनजागृती केली जात आहे. शहरातील सामाजिक कार्यकर्त्यांनी एकत्र येत "ऍन्टी स्पीट मुहमेंट' सुरू करत रस्त्यांत थुंकणाऱ्यांचे प्रबोधन करण्यासाठी सोशल मीडियाच्या माध्यमातून चळवळ उभा केली आहे. त्याद्वारे ही लोकांचे प्रबोधन करण्याचा प्रयत्न सुरू आहे. 

नागरिक झाले सजग 
रस्त्यावर थुंकणे हे कोरोनाच्या समूह संसर्गाला आमंत्रण ठरू शकते, हे समजल्यानंतर रस्त्यावर, सिग्नल चौकात थुंकण्याचे प्रकार कमी झाले आहेत. अनेक जण दंडात्मक कारवाईच्या भीतीने सार्वजनिक ठिकाणी थुंकण्याचा धसका घेतला आहे. 
तसेच रात्रीच्या वेळी चौकातल्या कट्टयावर बसून मावा, गुटखा खात थुंकणाऱ्या टोळक्‍यांवर कारवाईची गरज आहे. 

असे आहे कारवाईचे पथक 
-शहरात एकूण 5 पथके कार्यरत 
-3 महापालिका अधिकाऱ्यासह 1 पोलिस कर्मचारी 
-शहर वाहतूक पोलिस कर्मचाऱ्यांना कारवाईचे अधिकार 

35 लाखाचा दंड वसूल... 
सोशल डिस्टंन्स न पाळणे, मास्क न घालणे, सार्वजनिक ठिकाणी थुंकणे, तसेच नियमांचे उल्लघंन करत दुकाने, हॉटेल सुरु ठेवणे या कारणांसाठी महापालिका प्रशासनाने 35 लाखांचा दंड वसूल केला आहे. 
- संपादन ः यशवंत केसरकर