बेळगावात 'या' मागण्यांसाठी आशा कर्मचार्‍यांनी छेडले काम बंद आंदोलन...

बेळगाव - मासिक बारा हजार रुपये मानधनासह कोरोना विरोधात कार्य करणाऱ्या आशा कार्यकर्त्यांना आवश्‍यक सुरक्षा साहित्य द्यावे. तसेच कोरोनाचा संसर्ग झाल्यास भरपाईसह संपूर्ण उपचार खर्च शासनाने करावा, या मागणीसाठी शुक्रवारी (ता. 10) आशा कार्यकर्त्यांनी काम बंद आंदोलन छेडले.

30 जून पासून आशा कार्यकर्त्यांनी विविध मार्गाने आपल्या मागण्यांसाठी शासनाने लक्ष वेधले आहे. तालुका, जिल्हा पातळीवर सांकेतीक आंदोलन यापूर्वी छेडण्यात आले होते. यासह जिल्हाधिकारी आणि लोक प्रतिनिधींना देखिल मागण्यांचे निवेदन देण्यात आले आहे. जानेवारीपासून आतापर्यंत आशा कार्यकर्ता संघटनेतर्फे शासनाला आपल्या विविध मागण्यांचे दहा निवेदन सादर करण्यात आले आहे. पण, शासनाने या विषयावर चर्चा करण्यासाठी अद्याप एकाही बैठकीचे आयोजन संघटनेसोबत केले नसून मागण्यांकडेही दुर्लक्ष केले असल्याचा आरोप संघटनेने केला आहे. आज सकाळी येथील राणी चन्नम्मा चौकात आशा कार्यकर्ता संघटनेने याविरोधात आवाज उठविला. यानंतर जिल्हा कुटुंब कल्याण अधिकाऱ्यांना मागण्यांचे निवेदन सादर करण्यात आले.

वाचा - कोल्हापूर जिल्ह्यातील 'हे' 24 बंधारे पाण्याखाली ; राधानगरीतून 1400 क्युसेक विसर्ग

आशा कार्यकर्त्यांनी आपल्या मागण्यांच्या पूर्ततेसाठी आजपासून बेमुदत आंदोलन छेडले असल्याने ग्रामीण भागातील आरोग्य सेवेवर गंभीर परिणाम जाणवणार आहे. सध्या कोरोना संसर्ग थांबविण्याच्या जबाबदारी आशा कार्यकर्त्यांचे कार्य मोलाचे ठरले आहे. कोरोनाचे सर्व्हेक्षण करण्यासह इतर सर्व आरोग्य सेवेच्या कार्यात आशा कार्यकर्त्या दिवसरात्र काम करीत आहेत. मानधन वाढीसाठी यापूर्वी देखिल आंदोलन छेडण्यात आले होते. मात्र अद्याप त्याची दखल घेण्यात आलेली नाही. सध्या कोरोना योद्धा म्हणून काम करीत असताना देखिल त्यांना योग्य आणि वेळेत मानधन मिळालेले नाही. यासाठी दरमहा बारा हजार रुपये मानधनाची मागणी करीत आशा कार्यकर्ता संघटनेने बेमुदत आंदोलन हाती घेतले आहे.

संपादन - मतीन शेख