खानापूर (बेळगाव) : गेल्या काही दिवसांपासून गणेबैलजवळच्या भूतनाथ डोंगरावर करणीबाधेचे प्रकार वाढीस लागल्याने झाडअंकले, माळअंकले आणि गणबैलमधील ग्रामस्थ त्रस्त झाले होते. या प्रकाराला कंटाळून गावपाळण करून ही पिडा टाळण्याचा प्रयत्न ग्रामस्थांनी गत महिन्यात केला होता. तरीही हे प्रकार थांबले नव्हते. आज पहाटे करणीबाधा करणारे दोन जण डोंगरावर आढळून आल्यावर त्यांना चांगलाच चोप देण्यात आला.
खानापूर-बेळगाव महामार्गावरील गणेबैलजवळील भूतनाथाचा डोंगर हे प्रेक्षणीय स्थळ आहे. रोज शेकडो पर्यटक याठिकाणी येतात. डोंगरावर भूतनाथाचे मंदिर आहे. काही दिवसांपासून मंदिरात काळ्या बाहुल्या लटकवल्या जात असल्याची बाब स्थानिकांच्या निदर्शनास आली होती. त्यामुळे भीतीचे वातावरण निर्माण झाले होते. त्यातून सुटका करून घेण्यासाठी परिसरातील गावांनी काही दिवस गावपाळण केली. तरीही काळ्या बाहुल्यांचा हा खेळ बंद झाला नव्हता. आज नेहमीप्रमाणे माळअंकलेतील काही जण पहाटे भूतनाथाची पूजा करण्यासाठी डोंगरावर गेले असता दोघे मांत्रिक त्याठिकाणी काहीतरी करणीबाधा करून मंदिरात काळ्या बाहुल्या बांधत असल्याचे आढळून आले.
स्थानिक तरुणांनी त्या दोघांना ताब्यात घेऊन त्यांना चांगला चोप दिला. त्यात हिंडलगा, बेळगावमधील एकासह तालुक्यातील अन्य एकाचा समावेश आहे. चांगला समाचार घेतल्यावर त्यांना पोलिसांच्या स्वाधीन करण्यात आले. मात्र, रात्री उशिरापर्यंत त्यांच्यावर गुन्हा नोंद झाला नव्हता.
संपादन - अर्चना बनगे
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.