विसापूरची अंध रिना बनली एक दिवसाची पोलिस आयुक्त

विसापूर (जि. सांगली) : येथील दृष्टिहीन असलेल्या रीना पाटील या एक दिवसासाठी पोलिस आयुक्त बनल्या. पिंपरी-चिंचवड विभागाचे आयुक्त कृष्णप्रकाश यांनी हा बहुमान त्यांना प्रजासत्ताकदिनी दिला. पोलिस आणि नागरिकांतील दरी कमी व्हावी. सुसंवाद वाढावा यासाठी कृष्ण प्रकाश यांनी हा उपक्रम राबवला.

दोन्ही डोळ्यांनी अंध रिना यांना ही जबाबदारी मिळाल्याने खूप आनंद झाला. त्यांच्या धैर्याचे कृष्ण प्रकाश यांनी कौतुक केले. दरम्यान, पोलिसांचे संचलन करतानाची छायाचित्रे समाज माध्यमावर व्हायरल होताच त्यांच्यावर कौतुकाचा वर्षाव झाला. भार्गव पाटील विकास सोसायटीचे स्वस्त धान्य दुकान चालवतात. त्यांना रीनासह चार मुली आहेत. रीना दोन्ही डोळ्यांनी जन्मांध आहे. वडिलांनी पुणे येथे पाचव्या वर्षीच अंधशाळेत प्रवेश घेऊन दिला.

शिक्षण पूर्ण झाल्यानंतर पुण्यातच एका बॅंकेत त्यांना नोकरी मिळाली. नोकरी करत असतानाच त्यांचे समाजकार्यही सुरू होते. जवळच्याच अंध मैत्रिणीचा विवाह लावून दिला. गावात सामाजिक उपक्रम राबविताना विविध व्याख्यानांबरोबर कीर्तने आयोजित करतात. अमेरिकेसह कुवेतचा परदेश दौराही त्यांनी केला आहे. क्रांतिसिंह नाना पाटील व्याख्यानमालेच्या वतीने त्यांचा सन्मान करण्यात आला होता. 

नागरिक व पोलिसांत सुसंवाद वाढावा, पोलिसांबद्दलचा आदर वाढून समाजात भीती कमी व्हावी, पोलिसांची कर्तव्ये, कामाच्या पद्धती याचा अनुभव नागरिकांनी घ्यावा, या उद्देशाने कृष्ण प्रकाश यांनी सामान्य नागरिकांना एक दिवसासाठी पोलिस अधिकारी बनविण्याचा उपक्रम राबवला आहे. यात रिना यांना एक दिवस पोलिस आयुक्त म्हणून जबाबदारी देण्यात आली होती. 

आयुक्त पदावर काम केल्याच्या रोमांचक अनुभवाबद्दल बोलताना रिना म्हणाल्या, ""तुम्हाला एक दिवस अधिकारी बनायचे आहे. असा फोन मला आयुक्त कार्यालयातून आला. पोलिस म्हणून काम करणार असल्याने मी भारावून गेले. डॅशिंग व भारदस्त व्यक्तिमत्त्व असलेल्या आयुक्त कृष्णप्रकाश यांच्या खुर्चीवर बसण्याचा प्रसंग माझ्यासाठी अविस्मरणीय होता.'' 

हा अंधांचा सन्मान! 
प्रजासत्ताकदिनाचे संचलन, गाडीत बसण्याची ऐट आणि वर्दी परिधान केल्यानंतर त्याचे समजलेले महत्त्व वेगळाच अनुभव होता. या सन्मानामुळे अंधांचे समाजातील स्थान आणखी उंच झाले, असे रिना पाटील म्हणाल्या. 

संपादन : युवराज यादव