गोकुळच्या "हंडी'त राजकारणाचा "दहीकाला'

गडहिंग्लज : जिल्ह्यातील शिखर संस्थांपैकी एक जिल्हा दूध उत्पादक संघाच्या (गोकुळ) निवडणुकीला हळूहळू धार येत आहे. गोकुळच्या सत्तेची "हंडी' मिळवण्यासाठी ठराव दाखल करण्याच्या मुदतीत सत्तारूढ आणि विरोधकांतील राजकारणाचा "दहीकाला' झाला असून ठराव दाखल करताना दोन्ही बाजूंच्या एकसंधतेला तडा गेल्याचे चित्र स्पष्ट झाले. बहुतांशी गटनेत्यानी आपापल्या वर्चस्वासाठी स्वतंत्रपणे ठराव दाखल करून "हम भी कुछ कम नही' हेच दाखवून दिले आहे. ठराव दाखल करतेवेळी सवतासुभा मांडलेले प्रत्यक्ष मैदानात कोणती भूमिका घेतात, याकडेही लक्ष आहे. 

गोकुळ निवडणुकीत विधानसभा निवडणुकीतील राजकारणाची किनार मिळणार हेही निश्‍चित आहे. सत्तारूढांच्या विरोधात महाविकास आघाडी तयार करण्याच्या हालचालींना वेग आला तरी ठराव दाखल करतेवेळी या आघाडीतील घटक असलेल्या काही गटनेत्यांनी स्वतंत्रपणे ठराव सादर करण्यात धन्यता मानली आहे. याशिवाय सत्तारूढ गटातील काही प्रमुखांनीही ठराव दाखल करण्यात सवतासुभा मांडला. स्वतंत्रपणे ठराव दाखल केलेल्या गटनेत्यांची भूमिका काय असेल हे अजून तरी गुलदस्त्यातच आहे. योग्य वेळी पत्ते खुले करण्याचा या गटनेत्यांचा प्रयत्न राहणार आहे. यामुळे सत्तारूढ आणि विरोधी नेते बुचकळ्यात पडल्याचे चित्र आहे. राजकीय वर्चस्व सिद्ध करण्यासाठी काही गटनेत्यांनी स्वतंत्रपणे ठराव सादर करण्यात धन्यता मानल्याचेही बोलले जाते. म्हणजेच हे सारे प्रयत्न गोकुळमध्ये प्रवेश मिळावा यासाठीच असल्याचेही सांगितले जाते. परंतु यामुळे भविष्यात पुन्हा राजकारणाची खिचडी होण्याचे संकेत मिळत आहेत. 

महाविकास आघाडी गोकुळ निवडणुकीतही कायम ठेवण्याच्या हालचाली सुरू झाल्या असल्या तरी त्याच्या मूर्तस्वरूपासाठी प्रत्यक्ष निवडणुकीपर्यंत वाट पाहावी लागणार आहे. दरम्यान, प्रत्येक तालुक्‍यात गोकुळच्या हंडीपर्यंत पोहोचण्यासाठी इच्छुकांची भाऊगर्दी होणार आहे. सत्तारूढ आणि विरोधी नेत्यांनाही ही डोकेदुखी होण्याचे संकेत आहेत. गडहिंग्लज तालुक्‍याचेच उदाहरण घेतले तर सत्तारूढकडून माजी अध्यक्ष राजकुमार हत्तरकी यांचे सुपुत्र सदानंद, गोडसाखर संचालक प्रकाश चव्हाण, विद्यमान संचालक रामराज कुपेकर यांचे प्रयत्न सुरू आहेत. विरोधी आघाडीकडून जि. प. चे उपाध्यक्ष सतीश पाटील, पंचायत समिती सदस्य विद्याधर गुरबे, बाळासाहेब कुपेकर, सोमगोंडा आरबोळे इच्छुक असल्याचे कळते. यातील प्रत्येक इच्छुकांनी आपापल्या कुवतीने ठराव नेत्यांपर्यंत पोहचवले आहेत. पाटील हे ग्रामविकास मंत्री हसन मुश्रीफ यांचे तर श्री. गुरबे हे पालकमंत्री सतेज पाटील यांचे कट्टर समर्थक मानले जातात. कुपेकर यांनी गतवेळी विरोधी आघाडीतून नशीब आजमावले होते. जनता दलाचे नेते ऍड. श्रीपतराव शिंदे यांच्या कन्या स्वाती कोरी यांच्या उमेदवारीसाठीही प्रयत्न सुरू आहेत. दोन्ही आघाड्यांकडे इच्छुकांची संख्या अधिक आहे. यामुळे प्रत्यक्षात कोणाच्या गळ्यात उमेदवारीची माळ पडते, हे आता ज्या-त्या वेळच्या राजकीय घडामोडीवरच स्पष्ट होणार आहे. 

"टोकन मनी'ची स्ट्रॅटेजी 
गोकुळ निवडणुकीत मतदान करण्याचा ठराव आपल्याच बाजूच्या कार्यकर्त्याच्या नावे मिळवण्यासाठी चढाओढ सुरू होती. यासाठी दोन्ही बाजूंनी "टोकन मनी'ची स्ट्रॅटेजी अवलंबल्याची चर्चा आहे. एका बाजूच्या इच्छूकांनी 25 हजार तर दुसऱ्या बाजूने 10 हजाराचे "टोकन' ठरावधारकांच्या हातात दिल्याची चर्चा दबक्‍या आवाजात सुरू झाली आहे. प्रत्यक्ष मतदानावेळी ही टोकन मनी कोणाच्या पारड्यात जाणार, हे आता निकालाची हंडी फुटल्यानंतरच समजणार आहे.