उमेदवारीवरून घराघरांत महाभारत ; पारावरील गप्पांमध्ये बांधले जाताहेत आडाखे

जयसिंगपूर (कोल्हापूर) : भावकीत वाद लावण्याचा उद्योग म्हणजे ग्रामपंचायतीच्या निवडणुका असे बोल निवडणूक लागलेल्या गावांमधून ऐकायला मिळत आहेत. कुणाचे पॅनेल आणायचे आणि कुणाचे विसर्जन करायचे याची फिल्डिंग कशी लावायची याच्या गावगप्पा पारावर रंगत आहेत. 

शिरोळ तालुक्‍यातील काही गावांत तर उमेदवारीवरूनच घराघरांत वादाला तोंड फुटल्याच्या घटना समोर येत आहेत. 
ग्रामपंचायतीसाठी अर्ज दाखल करण्याच्या प्रक्रियेला प्रारंभ झाल्यानंतर आता उमेदवारीवरूनही महाभारताला प्रारंभ झाला आहे. लोकसभा, विधानसभा, जिल्हा परिषद अथवा पंचायत समितीच्या निवडणुकीपेक्षाही संवेदनशील राजकारण ग्रामपंचायतीच्या निवडणुकीत असते.

हेही वाचा - ग्रामीण भागात पक्षविस्तार करण्यासाठी निवडणूक म्हणजे नामी संधी -

गावात भावकीतच नव्हे तर घराघरांतही यातून वादाचे प्रसंग उद्‌भवतात, हे प्रकार नवीन नाहीत. शिरोळ तालुक्‍यातील ३३ ग्रामपंचायतींच्या निवडणुकीचा कार्यक्रम जाहीर झाल्यानंतर यंदा निवडणुकीत उतरायचेच या इराद्याने अनेक जण गुडघ्याला बाशिंग बांधून तयारीलाही लागले आहेत. 

मात्र, निवडणुकीतील विजयासाठी कोण अडचणीचा ठरणार तर कुणाची उमेदवारी फायदेशीर ठरणार, असे अनेक आडाखे बांधले जात असताना काहींनी माघार घ्यावी यासाठी मनधरणीही सुरू आहे; पण इरादा पक्का करून तयारी करणाऱ्यांनी यंदाची निवडणूक लढविणार असल्याचा प्रचार सुरू केल्यामुळे आता माघारीची पंचाईत होऊन बसली आहे. 

गावगाड्याचे राजकारण घरातून सुरू होते आणि घरातूनच घडामोडींना प्रारंभ होतो. यामुळे घरातील इतर सदस्यांना विश्‍वासात  घेऊन मार्गातील अडचण दूर करण्यास भाग पाडणारी यंत्रणाही कामाला लागली आहे. यातून घराघरांत वादाच्या घटना घडत आहेत. 

हेही वाचा -  धनुष्यबाण देणार अपक्षांना बळ ? -

अडसर दूर करणारी यंत्रणा कार्यान्वित

ग्रामपंचायतीच्या निवडणुकीची ईर्ष्या खऱ्या अर्थाने सुरू झाली आहे. यातून कुणाची अडवायची आणि कुणाची जिरवायची याचेही आडाखे बांधले जात आहेत. ग्रामपंचायतीच्या निवडणुकीच्या घडामोडी वेगवान झाल्या असून, उमेदवारी अर्ज दाखल करण्याच्या मुदतीत त्या आणखी वेगवान होणार आहेत. एकूणच पहिल्या टप्प्यात मार्गातील अडसर दूर करणारी यंत्रणा कार्यान्वित झाली आहे.

संपादन - स्नेहल कदम