कोल्हापुरात मराठा आरक्षण गोलमेज परिषदेला प्रारंभ : 15 ठराव मंजूर

कोल्हापूर : सर्वोच्च न्यायालयाने मराठा आरक्षणाला दिलेली अंतरिम स्थगिती उठवून समाजाला पूर्ववत आरक्षण मिळावे, समाजातील विद्यार्थी व विद्यार्थीनींच्या चालू शैक्षणिक वर्षातील फीचा परतावा शासनाकडून मिळावा, केंद्र सरकारच्या आर्थिक दुर्बल घटकांसाठीच्या आरक्षणाचा लाभ समाजाला मिळावा, यासाठी राज्य सरकारने अध्यादेश काढावा, आदी पंधरा ठराव आज येथील राज्यव्यापी मराठा आरक्षण परिषदेत मंजूर झाले.

दरम्यान, येथील रावजी मंगल कार्यालयात परिषदेला प्रारंभ झाला असून परिषदेत समाजातील विविध प्रश्‍न आणि आंदोलनाच्या पुढील दिशेबाबत सविस्तर चर्चा केली जाणार आहे. 
महाराष्ट्र शासनाकडून केल्या जाणाऱ्या मेगा भरतीला स्थगिती मिळावी, शिवस्मारकाचे काम तातडीने व्हावे, राज्यातील शेतकऱ्यांचे सरसकट वीजबिल माफ करावे, कोपर्डी प्रकरणातील दोषींना त्वरित शिक्षा मिळावी, राज्यातील सर्व जिल्ह्यामध्ये वसतिगृहे व्हावीत, आदी ठराव परिषदेने मंजूर केले आहेत.

हेही वाचा- सतेज पाटील यांच्या ९५९९ ची कार्यकर्त्यांत क्रेझ -

विजयसिंह महाडिक यांनी ठरावांचे वाचन केले तर भरत पाटील यांनी अनुमोदन दिले. सर्वानुमते हे ठराव शासनाला पाठवले जाणार आहेत. मराठा आरक्षण संघर्ष समितीचे सुरेश पाटील यांच्यासह राज्यातील पन्नासहून अधिक संघटनांचे पदाधिकारी परिषदेत सहभागी झाले आहेत. दरम्यान, "एक मराठा- लाख मराठा', "आरक्षण आमच्या हक्काचं' अशा घोषणा देतच परिषदेला प्रारंभ झाला.