दोन्ही काँग्रेसला सत्ताबदलाचे वेध ; भाजपमधून कोण करणार बंडखोरी ?

सांगली : महापालिकेत काँग्रेसलाही आता सत्ता ताब्यात घेण्याचे वेध लागलेत. शहर जिल्हाध्यक्ष पृथ्वीराज पाटील यांनी सत्ताबदल झाला पाहिजे, असे मत मांडत त्याचे संकेत दिलेत. आगामी महापौर पद खुल्या प्रवर्गातील असल्याने सत्ताधारी भाजपात इच्छुकांची संख्या वाढली आहे. राष्ट्रवादीच्या सत्तेच्या मनीषा आधीच उघड झाल्यात. त्यांच्या प्रयत्नांना काँग्रेसची पूर्ण साथ मिळते का ? हे लवकरच स्पष्ट होईल.

हेही वाचा - आता घड्याळाची टिकटिक होणार वेगाने -

भाजपचे चिन्हावर ४१ आणि पाठिंबा दिलेल्या अपक्षांचे दोन असे ४३ संख्याबळ आहे. काँग्रेसचे १९ आणि राष्ट्रवादीचे १५ असे संख्याबळ आहे. सत्ताबदलासाठी दोन्ही काँग्रेस एकत्र येणे, त्याला भाजपमधील फुटीर बंडखोरांची साथ हवी. गेल्या महिन्यात स्थायी सभापती निवडीवेळी काँग्रेसच्या मंगेश चव्हाण यांना पुढे करीत राष्ट्रवादीने सत्ताबदलाची तयारी केली.

काँग्रेसमधून स्पष्ट संकेत मिळाले नाहीत. भाजपचे सहयोगी सदस्य गजानन मगदूम यांनी ऐनवेळी मागे पाय ओढल्याने भाजपच्या पांडुरंग कोरे यांचा बिनविरोध सभापतीपदाचा मार्ग मोकळा झाला. श्री. कोरे यांच्या निवडीनंतर प्रदेशाध्यक्ष चंद्रकांत पाटील यांनी ब्रँडेड भाजपचाच महापौर असेल, असे सांगत दोन्ही काँग्रेस, भाजपमधील सुप्त बंडखोरांनाही थेट आव्हान दिले.

हेही वाचा -  दुष्काळी भागात फुलवले नंदनवन ; अडीच एकरात ड्रॅगन फ्रूटची शेती -

महापौर कौन ?

फेब्रुवारीत महापौर निवड असेल. घोडे मैदान दूर असले तरी दोन्ही काँग्रेसबरोबरच भाजपमधील इच्छुकांच्या हालचाली गतिमान झाल्या आहेत. कळीचा मुद्दा ‘महापौर कौन’ ? हाच असेल. व्हिप डावलून भाजपमधून कोण बंडखोरी करणार ? महापालिकेत सत्ता ताब्यात घेतली तर त्यावर काँग्रेसला राष्ट्रवादीला नियंत्रणात ठेवता येईल का ? असे उपप्रश्‍न आहेत. मात्र सत्ताबदलासाठी दोन्ही काँग्रेसमध्ये हालचाली सुरू झाल्यात हे नक्की.

संपादन - स्नेहल कदम