लष्करी अधिकारी असल्याची बतावणी करत तब्बल पाच जणींशी केले लग्न; वीरपत्नींना हेरुन पेन्शन मंजूर करतो म्हणत केली फसवणूक

बेळगाव : लष्करी अधिकारी असल्याची बतावणी करत वीरपत्नींना पेन्शन मंजूर करतो. तसेच आपण अविवाहित असल्याचे सांगत तब्बल पाच विवाह करणाऱ्या तोतया लष्करी अधिकाऱ्याला अटक करण्यात आली आहे. मंजुनाथ बिरादार (वय ३४, रा. नालवतवाड, ता. मुद्देबिहाळ, जि. विजापूर) असे त्याचे नाव आहे. कॅम्प पोलिसांनी नुकतीच ही कारवाई केली असून त्याची रवानगी कारागृहात केली आहे.

वरील संशयिताला गत महिन्यात २१ रोजी मराठा लाईट इन्फंट्री आवारात लष्करी गणवेशात संशयास्पदरित्या फिरताना ताब्यात घेतले होते. अधिक चौकशीसाठी त्याला कॅम्प पोलिसांच्या ताब्यात देण्यात आले. पोलिसांनी त्याची कसून चौकशी केली असता धक्कादायक माहिती पुढे आली. मंजुनाथ हा आपण सुभेदार मेजर असल्याचे सांगत लष्करी गणवेशात फिरत होता.

हेही वाचा- पुणे पदवीधर मतदार संघातून भाजपची उमेदवारी सांगलीच्या संग्रामसिंह देशमुख यांना जाहीर -

वीरपत्नींना हेरुन वन रॅंक वन पेन्शन मंजूर करतो, असे सांगून फसगत करुन पैसे उकळत होता. तसेच मी अनाथ असून मला लग्न करायचे आहे, असे सांगत विविध गावातील लोकांची भेट घेऊन त्याने आतापर्यंत पाच विवाह करत तरुणींची फसवणूक केल्याची कबुली दिली. त्याच्याविरोधात यापूर्वीच बेळगाव, विजापूर, इंडी, रायचूर यासह पाच ठिकाणी गुन्हे दाखल झाले आहेत. चार दिवसांपूर्वी संशयिताची चौकशी करून त्याची रवानगी हिंडलगा कारागृहात करण्यात आली आहे.

संपादन - अर्चना बनगे