कोल्हापुरात महेंद्रसिंह धोनी-रोहित शर्माचे चाहते भिडले? जाणून घ्या नेमकं काय घडलं?

कोल्हापूर : कोल्हापुरात कधी कुठल्या गोष्टीवरून राडा होईल हे सांगता येत नाही. कोल्हापूर जिल्ह्यातील कुरुंदवाड याठिकाणी महेंद्रसिंह धोनी आणि रोहित शर्माचे चाहते आमने-सामने आल्याची बातमी सोशल मीडियावर व्हायरल झाली आणि गावात एकच वादळ उठलं. या वादात एकाला उसाच्या मळ्यात नेऊन चोप दिल्याचं वृत्त होतं. पण, प्रत्यक्षात असा प्रकारच घडला नसल्याचं स्पष्ट होतंय.

वीरेंद्र सेहवागचं ट्विट

महेंद्रसिंह धोनी यांनं आंतरराष्ट्रीय क्रिकेटमधून निवृत्ती घेतल्यानंतर कोल्हापूर जिल्ह्यातील कुरुंदवाड याठिकाणी त्याच्या कौतुकाचे होर्डिंग्ज चाहत्यांकडून लावण्यात आले. त्यानंतर लगेच रोहित शर्माला खेल रत्न पुरस्कार जाहीर झाल्यानंतर रोहितच्या चाहत्यांनी देखील कुरुंदवाड शहरात अभिनंदनाचे होर्डिंग लावले. या दोन्ही खेळाडूंच्या चाहत्यांमध्ये वाद सुरू झाल्याची चर्चा होती. यातून एकाला मारहाण झाल्याचं वृत्त आलं. विशेष म्हणजे, हा विषय माजी सलामीवीर वीरेंद्र सेहवानं ट्विट करून गोंधळात भर घातली. सेहवागच्या ट्विटमुळं सोशल मीडियावर आणखीनच या विषयाची चर्चा सुरू झाली. 

हे पण वाचा - काँग्रेसच्या आणखी एका आमदारांना कोरोनाची लागण

होर्डिंग्ज काढून टाकली 

रोहित शर्माच्या अभिनंदनाचे होर्डिंग्ज अज्ञातांनी फाडल्याची चर्चा होती. त्यामुळे या चाहत्यांच्या गटातील धुसफूस आणखी वाढली. होर्डिंग्ज फाडाफाडी केल्याचा कारणावरून रोहित शर्माचा फॅन असलेल्या तरुणाने राग व्यक्त करत शिवीगाळ करायला सुरुवात केली. त्यानंतर शिवीगाळ करणाऱ्या चाहत्याला उसाच्या मळ्यात नेऊन चोप दिल्याची चर्चा सुरू होती. पण, स्थानिक पोलिसांनी आणि ग्रामस्थांनी असा कोणताही प्रकार घडला नसल्याचं स्पष्ट केलं. मात्र, संबधित होर्डिंग्ज पालिकेला सांगून काढण्यात आली असल्याची माहिती कुरुंदवाडचे पोलीस निरीक्षक चंद्रकांत निरवडे यांनी दिली आहे. तसेच जिल्हा पोलिस अधिक्षक अभिनव देशमुख यांनी देखील असा कोणताही प्रकार घडला नसल्याचं सांगितलंय.

हे पण वाचा -  कोल्हापूर जिल्ह्यात ई-पासची सक्ती कायम ; काय आहे कारण?  

संपादन- धनाजी सुर्वे