‘ओन्ली ॲडमिन कॅन सेंड मेसेज’

कोल्हापूर - व्हॉटस्‌ॲप ग्रुपवर आलेले आक्षेपार्ह मेसेज फॉरवर्ड करणाऱ्यांवर गुन्हे नोंद करण्यास पोलिस प्रशासनाने सुरवात केली आहे. व्हॉट्‌सॲप ग्रुपवर अफवा, तेढ पसरविणारे मेसेज टाकले तर ग्रुपच्या ॲडमिनसह ज्या सदस्याने मेसेज टाकला, त्याच्यावर कारवाई होते. हे टाळण्यासाठी अनेक जणांनी आपल्या ग्रुपची सेटिंग ‘ओन्ली ॲडमिन कॅन सेंड मेसेज’ अशी केली आहे. ग्रुपची सेंटिग अशी करण्याबाबत पोलिस प्रशासनानेही आवाहन करण्यास सुरवात केली. 

‘कोरोना’च्या पार्श्‍वभूमीवर सोशल मीडियावर अफवांचे पेव फुटले. असे मेसेज व्हॉट्‌सॲप ग्रुपवर फॉरवर्ड होऊ लागले. समाजात चुकीचे संदेश पसरू लागल्यानंतर पोलिस प्रशासनाने कारवाईची मोहीम सुरू केली. १ एप्रिलला कोरोनाच्या बाबतीत एप्रिल फूल म्हणून चुकीचे मेसेस फिरू नयेत, यासाठी प्रशासनाने आवाहन केले होते. तेव्हापासूनच अनेक ग्रुपच्या ॲडमिननी ग्रुपचे सेटिंग्सही बदलले आहेत. ॲडमिनशिवाय कोणीही ग्रुपवर मेसेज टाकणार नाही, याची माहिती त्यापूर्वीच सदस्यांना दिली गेली. सदस्यांनीही त्याला मान्यता दिली. आणि रोज ॲक्‍टिव्ह असणारे ग्रुपही शांतच आहेत. 

कोरोनाचे संकट वाढत असतानाच अशा अफवा पसरविणाऱ्या सदस्य व ग्रुपच्या ॲडमिनवर गुन्हे नोंद होण्याचे प्रमाण वाढले. यानंतर पोलिस प्रशासनानेही व्हॉट्‌सॲप ग्रुपच्या ॲडमिनचे प्रबोधन करण्यास सुरवात केली आहे. 

मी जवळपास बारा ग्रुपमध्ये सदस्य आहे. त्यापैकी दोन ग्रुपचा ॲडमिन आहे. या सर्व ग्रुपची सेंटिग्स आम्ही बदलली आहे. त्यामुळे कोणीही आक्षेपार्ह मेसेज टाकत नाही. 
- कौस्तुभ दंडी