'पाच तासाची झुंज अयशस्वी ; आमच्या डोळ्यादेखतच त्याने सोडले प्राण' 

कोल्हापूर - कळंबा येथील कात्यायनी अपार्टमेंटमध्ये एक रुग्ण अत्यवस्थ असल्याचा निरोप आला. आम्ही धावत तिथे पोहोचलो. दोन दिवस ताप आल्याने रुग्ण अस्वस्थ होता. पीपीई कीट घालून शेजारी-पाजाऱ्यांच्या मदतीने रुग्णाला ऍम्ब्युलन्समध्ये घालण्यात आले. गाडी थेट आयसोलेशन येथे नेण्यात आली. डॉक्‍टरांनी बेड नसल्याचे सांगितले. यानंतर सीपीआर, मेडीकल कॉलेज असा प्रवास झाला. शहरातील बहुतांश रुग्णालयात बेड मिळाले नाहीत. अखेर थकूनभागून सीपीआर येथे पोहोचेपर्यंत आमच्या डोळ्यादेखतच रुग्णाचा मृत्यू झाला. असे सांगतच आशा कर्मचारी ज्योती तावरे यांचे आश्रू वहायला लागले. असे दररोज किती लोक आपला जीव गमावत आहेत. यावर काही होणार की नाही? अशी विचारणा त्यांनी केली आहे. 

ज्योती तावरे म्हणाल्या, गेली पाच महिने आम्ही कोवीडीचे काम करत आहोत. रात्री,अपरात्री फोन येतात, रुग्ण अत्यवस्थ आहे, काहीतरी करा, मात्र आम्ही तरी काय करणार... आम्हालाही मर्यादा आहेत. ज्या ठिकाणी पॉझिटिव्ह रुग्ण आढळतो त्या ठिकाणचा सर्व्हे करणे, संबंधित कुटुंबातील सदस्यांचे स्वॅब घेणे, तसेच त्यांना आयसोलेशनमध्ये पाठवण्याचे काम आम्ही करतो. मात्र काही वेळा माणुसकी म्हणून या रुग्णांना हॉस्पीटलमध्येही नेण्याची जबाबदारी पार पाडतो. 

दोनच दिवसापूर्वी सकाळी दहा वाजताच कात्यायनी अपार्टमेंटमध्ये एक रुग्ण अत्यवस्थ असल्याचा निरोप आला. या रुग्णाला ताप व अशक्‍तपणा आला होता. त्यामुळे आम्ही धावतच पोहोचलो. संबंधित रुग्णाची तब्येत खालवत असल्याने हॉस्पीटलमध्ये दाखल करणे आवश्‍यक होते. मात्र पीपीई कीट चढवून पुढे कोणी येईना. शेजाऱ्यांच्या मदतीने रुग्णास ऍम्ब्युलन्समध्ये घालण्यात आले. तेथून पुढे सुरु झाला धक्‍क्‍यांचा प्रवास. आयसोलेशन, सीपीआरपासून सर्व मोठमोठी हॉस्पीटल पालथी घालूनही बेड उपलब्ध झाला नाही. अखेर संबंधित रुग्णाला आपले प्राण गमवावे लागले.

हे पण वाचा - लाॅकडाऊनमध्ये अनेकांच्या नोकऱ्या गेल्या, पण 'या' क्षेत्रात आहे करिअरची मोठी संधी

शेवटच्या क्षणी कुटुंबाची भेटही झाली नाही. असे अनुभव दररोज कितीतरी रुग्णांबाबत येत आहेत. त्यामुळे ऑक्‍सीजन बेड रिक्‍त असलेली माहिती प्रशासनासह आशा कर्मचाऱ्यांना मिळावी, म्हणजे रुग्णाला वेळेत उपचार करण्याचा सल्ला देता येईल, असे ज्योती तावरे यांनी सांगितले. 

हे पण वाचा - छत्रपती शिवाजी महाराज यांच्या अवमान प्रकरणी सखल मराठा समाज रस्त्यावर 

 संपादन - धनाजी सुर्वे