धक्कादायक : विषारी नाग पकडायचा, त्याचे चुंबन घेत खेळ करायचा, तो डंख मारू लागताच माणसांच्या गर्दीत सोडायचा...

कोल्हापूर - विषारी साप पकडायचा, त्याचे चुंबन घेत खेळ करायचा, त्याचे फोटो फेसबुकवर टाकायचा. पण त्याला ही चांगलीच महागात पडली. नाग पकडून त्याच्याशी जीवघेणा स्टंटबाजी केल्याचा व्हीडीओ फेसबुकवर घुमला आणि वन्यजीवाचा छळ केल्या प्रकरणी त्याला वनकोठडीची हवा खान्याची वेळ आली. अल्ताफ कलावंत (वय 36 रा. इचलकरंजी) असे त्या संशयितांचे नाव आहे. 

वन्यजीवांचा खेळ केल्या प्रकारणी वन्य जीवकायदा 1972 अंतर्गत 39, 40, 42, 43 आदी कलमानुसार या तरूणाला इचलकरंजीत अटक केली. त्याला तीन दिवस वनविभागाच्या कोठडीत ठेवण्याचे आदेश न्यायालयाने दिले. अशी माहिती वनाधिकाऱ्यांनी दिली. 

गेल्या काही दिवसापासून एक व्यक्ती नागपकडून त्याच्या सोबत दंगा मस्ती करीत होता. तो नाग डंख मारू लागताच त्याला उचलून गर्दीच्या ठिकाणी फेकत होता. अशा धक्कादायक प्रकारची काही छायाचित्रे, व्हीडीओ समाजमाध्यमावर प्रसारीत झाली. 

त्याची माहिती वनविभागाला मिळताच माहिती सहाय्यक वनसंरक्षक तंत्रज्ञानाव्दारे शोध घेऊन कोल्हापूर वनविभागाच्या अधिकाऱ्यांनी त्या तरूणाला इचलकरंजीत सकाळी अटक केली. त्याच्याकडे चौकशी करताना साप पकडण्याची काठी, मोबाईल फोटो व्हिडीओ असे साहित्य मिळून आले. 

या तरूणाचे अन्य कोणी साथीदार आहेत, त्याने आत्ता पर्यंत किती साप पकडले, त्याचे पुढे काय केले. तस्करी झाली का विष काढले का? आदी बाबत माहिती घेण्यात येणार असल्याची माहिती वनाधिकाऱ्यांनी दिली. 

या कारवाईत वनक्षेत्रपाल युवराज पाटील, वनपाल घनशाम भोसले, वनरक्षक सागर यादव, सागर पटकारे आदीनी सहभाग घेतला. 

हे पण वाचा - ...तोपर्यंत शाळा राहणार बंदच

या पुढे ही होणार कारवाई 
सहाय्यक उपवनसंरक्षक सुनिल निकम म्हणाले की, "" वन्यजीवांना पकडून त्यांचा खेळ करणे किंवा त्यांना इजा पोहचेल असे कृत्य करणे वन्यजीव कायद्याचे उल्लंघन आहे. अशा व्यक्ती विरोधात वन्यजीव कायद्या अन्वये गुन्हा नोंद होऊ शकतो. तसेच वन्यजीव कुठे आढळल्यास त्याची माहिती वनविभागाला देणे अपेक्षीत आहे. वन्यजीवाला इजा पोहचविल्यास अन्न साखळी धोक्‍यात येऊ शकते. त्यामुळे वन्यजीवांशी खेळणाऱ्यांना शोधून त्यांच्यावर या पुढेही कारवाई सुरू रहाणार आहे.