आंबेओहोळ, नागनवाडी प्रकल्प पुनर्वसनाचा रेंगाळलेला प्रश्न मार्गी लावा

कोल्हापूर ः येत्या पंधरा दिवसांत अधिकाऱ्यांची बैठक घेऊन अप्पर जिल्हाधिकारी व पुनर्वसन अधिकारी यांनी आंबेओहोळ, नागणवाडी प्रकल्पाच्या पुनर्वनसनाचा प्रश्‍न मार्गी लावावा, अशा सूचना ग्रामविकासमंत्री हसन मुश्रीफ यांनी केल्या. 
येथील शासकीय विश्रामगृहात आंबेओहोळ, नागनवाडी प्रकल्पाच्या पुनर्वसनासंदर्भात आज ग्रामविकासमंत्र्यांनी बैठक घेतली. बैठकीला अप्पर जिल्हाधिकारी किशोर पवार, राधानगरीचे प्रांताधिकारी रामहरी भोसले, गडहिंग्लजच्या प्रांताधिकारी विजया पांगारकर, पाटबंधारे विभागाचे अक्षीक्षक अभियंता महेश सुर्वे, कार्यकारी अभियंता स्मिता माने, एस. आर. पाटील, पुनर्वसन तहसीलदार वैभव पिलारे उपस्थित होते. 
श्री. मुश्रीफ म्हणाले, की आंबेओहोळ, नागनवाडी प्रकल्पाच्या पुनर्वसनाचे काम 20 वर्षांपासून सुरू आहे. अधिकाऱ्यांनी गांभीर्याने लक्ष घालून रेंगाळलेली कामे मार्गी लावावीत. पावसाळ्यापूर्वी घळभरणी करावी. त्यासाठी निधीची कमतरता भासणार नाही. 
आंबेओहोळ आणि नागनवाडीच्या पुनर्वसनाबाबत जिल्हा पुनर्वसन अधिकारी आणि संबंधित प्रांताधिकारी या दोन्ही कार्यालयांमधील कामकाजामुळे प्रश्न प्रलंबित राहत आहेत. ते तत्काळ मार्गी लावण्यासाठी संबंधित प्रांताधिकाऱ्यांनाच अधिकार द्यावेत. त्यासंदर्भात 
आजच आदेश काढावेत, अशी सूचना ग्रामविकासमंत्री श्री. मुश्रीफ यांनी जिल्हाधिकारी दौलत देसाई यांना बैठकीमधून संपर्क साधत केली. 
श्री. मुश्रीफ म्हणाले, ""गलगले वसाहतीबाबत वन विभागाने जमीन देण्याची पूर्तता करावी. चांदोली अभयारण्यासाठी जमिनी दिलेल्या शाहूवाडी तालुक्‍यातील निवळे येथील ग्रामस्थांना कागल तालुक्‍यातील गलगलेमध्ये गावठाण वसाहत जमीन देण्यात आली. याबाबत उच्च न्यायालयाने जमीन मूळ मालकाला देण्याचे आदेश दिल्याने या बाधित ग्रामस्थांच्या वसाहतीचा प्रश्न निर्माण झाला आहे. वन विभागाची कागलमध्ये असणारी जमीन देण्याचा ठराव कागल नगर परिषदेने केला. वन विभागाने याबाबत त्यांना निर्वाह भत्ता देणे, तसेच जमीन देण्याची पूर्तता करावी. याबाबतचा प्रस्ताव जिल्हाधिकारी कार्यालयाकडे पाठवून पाठपुरावा करावा.''