मद्यविक्री दुकानदारांची का उडाली झोप ?

निपाणी - कोरोनाच्या पार्श्वभूमीवर जिल्ह्यातील सर्व दारू दुकाने महिनाभरापासून बंदच आहेत. त्यामुळे घरात साठा केलेली दारूही संपल्याने तळीरामांची गोची झाली आहे. त्यामुळे चिक्कोडी तालुक्यातील शिरगावमधील दारू दुकानच तळीरामांनी फोडले. पण तात्काळ पोलिसांच्या जाळ्यातही ते सापडले. काळ्या बाजारातील जादा दराने मिळणाऱ्या मद्यामुळे सैरभैर झालेल्या तळीरामांनी असे पुढचे पाऊल उचलले आहे. त्यामुळे मद्यविक्री दुकानदारांची झोप मात्र उडाली आहे.

जनता कर्फ्यूपासून सर्वच ठिकाणी लॉकडाउन करण्यात आला आहे. त्यामुळे शहर आणि ग्रामीण भागातील दारू दुकाने बंद असल्याने तळीरामांची बेचैनी वाढली आहे. बेकायदेशीर विक्री  करणाऱ्यांकडून जादा दराने ते दारू आणत आहेत.  कामधंदा नसल्याने रक्कमही संपली आहे. त्यातूनच थेट दारू दुकान फोडण्यापर्यंत तळीराम गेले आहेत. शिरगावच्या प्रकरणात  पोलिसांच्या सतर्कतेमुळे  चोरलेल्या ८० हजाराच्या दारूसह तीन जण तात्काळ गजाआड झाले आहे. अबकारी खात्याची बेकायदेशीर दारू विक्रीवर करडी नजर आहे. आता पुन्हा लॉकडाउन वाढण्याच्या भीतीने तळीरामांचा घसा कोरडा पडला असून दुकानदारांची चिंता वाढली आहे. त्यांना सुरक्षेबाबत ठोस उपाययोजना करावी लागणार आहे.
 

'दिवसभराच्या बंदोबस्ताबरोबरच शहर आणि ग्रामीण भागातील मद्यविक्री दुकानासमोरही पोलिस बंदोबस्त वाढविला आहे. त्यामुळे तळीरामांची अडचण झाली असून अशा घटना टाळण्यासाठी पोलिस यंत्रणा सतर्क केली आहे.'
- संतोष सत्यनायक,
 मंडल पोलिस निरीक्षक, निपाणी