कोल्हापूरकरांसाठी दिलासादायक बातमी; राधानगरी धरणाचे दोन दरवाजे बंद 

राशिवडे बुद्रुक : राधानगरी तालुक्यात पावसाचा जोर कमी झाला आहे. राधानगरीच्या धरणाच्या पाणलोट क्षेत्रात पावसाने उसंत घेतली असून धरणाच्या चार स्वयंचलित दरवाजांपैकी दोन दरवाजे आज पहाटे बंद झाले. सध्या दोन दरवाजे खुले आहेत. मात्र यामुळे भोगावती व पर्यायाने पंचगंगेचा पूर हळूहळू ओसरण्यास सुरुवात होणार आहे.

गेल्या चार दिवसाच्या पावसाच्या आक्रमक पवित्र्यामुळे राधानगरी धरण झपाट्याने भरले. गुरुवारी सायंकाळी दोन आणि मध्यरात्री दोन असे चार स्वयंचलित दरवाजे खुले झाले होते. यातून मोठ्या प्रमाणात विसर्ग भोगावती नदी पात्रात सुरू असल्याने पंचगंगेला महापूर आला होता. आज पहाटे साडेपाच वाजता चार पैकी क्रमांक सहाचा दरवाजा बंद झाला. तर पाठोपाठ सात वाजून पाच मिनिटांनी क्रमांक 3 हा दरवाजा बंद झाला. यामुळे विसर्गाची निम्म्याने घट झाली आहे. 

सध्या धरणाची पाणी पातळी 346.92  इतकी आहे. सुरु असलेल्या दोन स्वयंचलित दरवाज्यातून व पायथ्याच्या वीज निर्मिती गृहासाठी असे एकूण 4256 क्युसेक पाण्याचा विसर्ग नदीपात्रात सुरू आहे. आज सकाळपासून पावसाची उघडझाप असल्याने महापूर ओसरण्यास आता हळू हळू सुरुवात होणार आहे. परंतु, पावसाचा जोर वाढल्यास पुन्हा पूरस्थिती होण्याची शक्यता आहे.

हे पण वाचा - यांच्या संकल्पनेतून बांधल्या गेल्या कोल्हापुरातील ऐतिहासिक इमारती

दरम्यान, कोल्हापूर जिल्हा आपत्ती व्यवस्थापन कक्षाने दिलेल्या माहितीनुसार, आज सकाळी नऊ वाजता राजाराम बंधाऱ्याची पाणी पातळी ४४ फूट ६ इंच इतकी आहे. तर ८५  बंधारे पाण्याखालील आहेत. 

संपादन - धनाजी सुर्वे