चंदगड तालुक्यातील अडकूर येथील व्यक्तीचा कोरोनाने मृत्यू झाल्याने ग्रामस्थ हादरले...

चंदगड - अडकूर ( ता. चंदगड ) येथील एका ५० वर्षीय व्यक्तीचा कोरोनाने मृत्यू झाला. कोल्हापूर येथे सीपीआर रुग्णालयात उपचार सुरु असताना त्याची प्राणज्योत मालवली. मृत स्थानिक रहीवाशी होता. ग्रामस्थांत उठबैस असल्याने संपर्काची मोठी साखळी आहे. त्यामुळे अनेकांना हादरा बसला आहे. आरोग्य यंत्रणा त्याच्या संपर्कातील व्यक्तींची माहीती घेत आहे.

वाचा - कोल्हापुरात कोरोनाचा दहावा बळी...

संबंधीत मृत व्यक्तीचे बसस्थानक परिसरात घर आहे. दिड महिन्यापूर्वी त्याची आई पुण्याहून आली होती. ती आजारी असल्याचे समजते. दरम्यान मृताला चार दिवसापूर्वी पर्यंत कोणतेही लक्षण नव्हते. बसस्थानक परिसरात त्याचा वावर होता. अनेकजण त्याच्या थेट संपर्कात होते. चार दिवसापूर्वी त्याला श्वास घ्यायला त्रास होऊ लागला. स्थानिक प्राथमिक आरोग्य केंद्रातून त्याला गडहिंग्लजला नेण्यात आले. तिथून सीपीआर रुग्णालयात हलवण्यात आले. आज उपचार सुरु असताना त्याचे निधन झाले. आत्तापर्यंत सापडलेले रुग्ण शहरातून आले होते.  मृत नागरीक स्थानिक रहिवाशी असल्याने संसर्गाच्या बाबतीत अजूनही नागरीकांनी खबरदारी घेण्याची गरज या घटनेने अधोरेखित केली आहे.

आरोग्य विभागाने मृताच्या संपर्कातील व्यक्तींची माहिती घेण्यास सुरवात केली असून अती संपर्कातील व्यक्तींना क्वारंटाईन केले जाणार आहे. मृताच्या कुटुंबात आई, पत्नी व मुलगा आहे.