बापरे..! : ऍप डाउनलोड करायला सांगितले अन्‌ खात्यावरून "इतकी' रक्कम गायब 

सांगोला (सोलापूर) : तुमच्या पेटीएम अकाउंटची वैधता संपली आहे, असे सांगून एकाने प्ले स्टोअरवरून क्विक सपोर्ट ऍप डाउनलोड करावयास सांगितले अन्‌ अकाउंटचा आयडी क्रमांक विचारून घेत खात्यातून परस्पर 87 हजार रुपये काढून घेतल्याची घटना सांगोला येथे घडली आहे. 

हेही वाचा : "या' शासकीय रुग्णालयात केलेली स्त्री नसबंदी शस्त्रक्रिया असफल ! संबंधितांवर कारवाईसाठी तक्रारदाराने घेतली आमदाराकडे धाव 

माणिक बापू पवार (रा. नरेंद्रनगर, वासूद रोड, सांगोला) यांनी फिर्याद दिली आहे. त्यानुसार 10 जून रोजी सकाळी साडेअकराच्या सुमारास 9405844746 या क्रमांकावरून फोन आला आणि फोनवरील व्यक्तीने, आपल्या पेटीएम अकाउंटची वैधता संपली असल्याचे सांगून प्ले स्टोअरवरून क्विक सपोर्ट हे ऍप डाउनलोड करण्यास सांगितले. त्याप्रमाणे ऍप डाउनलोड केल्यानंतर पवार यांना आयडी क्रमांक विचारून घेतला व एक्‍झिट होण्यास सांगितले. त्यानंतर त्यांचे खाते असलेल्या लोकमंगल बॅंकचे खाते उघडण्यास सांगितले. बॅलन्स अपडेट करण्यासाठी त्यातील फंड ट्रान्सफर हा पर्याय निवडण्यास सांगून त्यांच्या खात्यात असलेले 87 हजार रुपये हडप केले. एका खात्यावर 49 हजार, दुसऱ्या खात्यावर 28 हजार व तिसऱ्या खात्यावर 10 हजार असे परस्पर काढून घेतले. ही बाब लक्षात आल्यानंतर माणिक पवार यांनी सायबर पोलिस ठाणे, सोलापूर यांच्याकडे तक्रार दाखल केली. यावरून कोणकोणत्या खात्यावर किती रक्कम हस्तांतरित झाली याची माहिती उघड झाली आहे. याबाबत पवार यांनी दिलेल्या फिर्यादीनुसार खाते क्रमांक व मोबाईल क्रमांक असलेल्या राजकुमार यादव व पुतुल संत्रा या दोघांवर फसवणुकीचा गुन्हा दाखल करण्यात आला आहे. पोलिस निरीक्षक राजेश गवळी तपास करीत आहेत. 

हेही वाचा : मोठी ब्रेकिंग! दरवर्षी साडेचार कोटी खर्चून आजी-माजी आमदारांना रेल्वे प्रवासासाठी मिळते "ही' सवलत 

याबाबत सांगोल्याचे पोलिस निरीक्षक राजेश गवळी म्हणाले, प्रत्येक नागरिकाने सतर्क राहून अनोळख्या कोणत्याही क्रमांकावरून फोन आल्यास आपले खाते क्रमांक, ओटीपी किंवा इतर कोणतीही माहिती देऊ नये. माहिती द्यावयाची असल्यास प्रत्यक्ष बॅंकेत जाऊन द्यावी. 

संपादन : श्रीनिवास दुध्याल