राष्ट्रीय आपत्ती व्यवस्थापन कायद्यांतर्गत "या' हॉस्पिटलमधील दोन कर्मचाऱ्यांविरोधात फिर्याद दाखल 

पंढरपूर (सोलापूर) : पंढरपूर शहरातील अधिग्रहित केलेल्या ऍपेक्‍स हॉस्पिटलमधील ब्रदर आणि सिस्टर अशा दोन कर्मचाऱ्यांशी संपर्क साधूनदेखील ते दोघे हॉस्पिटलमधील त्यांच्या कामावर हजर न झाल्याने पोलिसांनी त्यांच्या विरोधात गुन्हा दाखल केला आहे. प्रांत कार्यालयातील नायब तहसीलदार विजय जमादार यांनी दोन कर्मचाऱ्यांच्या विरोधात फिर्याद दिली आहे. 

हेही वाचा : "या' शहर-जिल्ह्यात दडल्यात अण्णाभाऊंच्या आठवणी; अमर शेख यांच्याशी होते जिव्हाळ्याचे संबंध 

शहर व तालुक्‍यातील कोरोनाबाधित रुग्णांची संख्या वाढत आहे. कोरोनाचा संसर्ग वाढू नये, यासाठी आणि रुग्णांच्या उपचारासाठी प्रशासनाने शहरातील काही हॉस्पिटलमधील डॉक्‍टर, परिचारिका आणि इतर स्टाफ यांची सेवा आपत्ती व्यवस्थापन प्राधिकरण अंतर्गत अधिग्रहित केली आहे. त्यापैकी पंढरपूर शहरातील ऍपेक्‍स हॉस्पिटलमधील सिस्टर अंजना तिवरासे (रा. तारापूर, ता.पंढरपूर) आणि ब्रदर आनंद ओहाळ (रा. शेटफळ, ता. मोहोळ) यांच्याशी 27 जुलैपासून संपर्क करून देखील हे दोघे त्यांच्या हॉस्पिटलमधील अत्यावश्‍यक सेवेसाठी हजर झाले नाहीत. त्यांना नेमून दिलेल्या कामात गैरहजर राहून कामात हलगर्जीपणा व टाळाटाळ केली. या कारणावरून या दोन कर्मचाऱ्यांच्या विरोधात प्रांत कार्यालयातील नायब तहसीलदार विजय जमादार यांनी पंढरपूर शहर पोलिस ठाण्यात फिर्याद दाखल केली असून, त्यावरून पोलिसांनी या दोन्ही कर्मचाऱ्यांच्या विरोधात राष्ट्रीय आपत्ती व्यवस्थापन कायद्यानुसार गुन्हा दाखल केला आहे. 

हेही वाचा : अरे देवा..! इथे मृत्यूनंतरही आत्म्यांना वाट पाहावी लागतेय मोक्षप्राप्तीसाठी; नातेवाईकही हळहळताहेत 

कोरोना रुग्णांची संख्या वाढत असताना डॉक्‍टर अथवा अधिग्रहित केलेल्या हॉस्पिटलमधील कर्मचाऱ्यांनी हलगर्जीपणा केला तर संबंधित डॉक्‍टर आणि कर्मचाऱ्यांच्या विरोधात आपत्ती व्यवस्थापन कायद्यानुसार गुन्हे दाखल केले जाणार आहेत. परिस्थितीचे गांभीर्य लक्षात घेऊन तशी वेळ संबंधितांनी येऊ देऊ नये; अन्यथा नाइलाजास्तव कडक कारवाई करणे भाग पडेल, असा इशारा प्रांताधिकारी सचिन ढोले यांनी दिला आहे. 

संपादन : श्रीनिवास दुध्याल