पंढरपुरातील महापूर चाळ परिसरात आढळले आठ कोरोना पॉझिटिव्ह रुग्ण; केला परिसर सील 

पंढरपूर (सोलापूर) : पंढरपूर शहरातील संत पेठमधील महापूर चाळ परिसरातील आठ व्यक्तींचे कोरोना रिपोर्ट सोमवारी रात्री पॉझिटिव्ह आले आहेत. त्यामुळे शहरातील रुग्णांची संख्या 43 वर पोचली आहे, अशी माहिती तालुका वैद्यकीय अधिकारी डॉ. एकनाथ बोधले यांनी दिली. 

हेही वाचा : डॉक्‍टरांना झाली कन्यारत्नाची प्राप्ती; त्यांच्या स्टाईलने केले तिचे असे स्वागत... 

पंढरपूर शहरातील रोहिदास चौकातील तीन, मंदिर परिसरातील संत तुकाराम भवनजवळील एक, झेंडे गल्लीमधील एक अशा पाच व्यक्तींचे रिपोर्ट सोमवारी 
पॉझिटिव्ह आले होते. त्यानंतर रात्री उशिरा आलेल्या अहवालात शहरातील संत पेठेतील महापूर चाळ भागातील एका कुटुंबातील चार आणि दुसऱ्या कुटुंबातील तीन व्यक्तींचे रिपोर्ट पॉझिटिव्ह आले आहेत. हे रिपोर्ट मिळताच प्रांताधिकारी सचिन ढोले, नगरपालिकेचे मुख्याधिकारी अनिकेत मानोरकर, उपमुख्य अधिकारी सुनील वाळूजकर, तालुका वैद्यकीय अधिकारी डॉ. एकनाथ बोधले यांच्यासह संबंधित अधिकाऱ्यांनी संत पेठ भागात जाऊन उपाययोजना सुरू केल्या असून, परिसर सील केला आहे. 

हेही वाचा : पुन्हा लॉकडाउनमुळे रोजीरोटीचा प्रश्‍न; मात्र कोरोनाला रोखणेही महत्त्वाचे! काय म्हणतात कामगार व उद्योजक? वाचा 

रात्री उशिरा आलेल्या अहवालात तालुक्‍यातील रोपळे येथील एका व्यक्तीचा रिपोर्ट देखील पॉझिटिव्ह आला. शहर व तालुक्‍यातील रुग्णांची संख्या 65 झाली. सध्या उपचार सुरू असलेल्या 32 व्यक्तींमध्ये शहरातील 21, तालुक्‍याच्या ग्रामीण भागातील सहा आणि इतर तालुके व जिल्ह्यांमधील पाच व्यक्तींचा समावेश आहे. आजपर्यंत शहरातील दोन व्यक्तींचा मृत्यू झाला आहे. सध्या 189 लोकांना संस्थात्मक विलगीकरणामध्ये ठेवण्यात आले आहे. आतापर्यंत शहर व तालुक्‍यातील 1083 व्यक्तींची तपासणी करण्यात आली. त्यापैकी 963 व्यक्तींचे अहवाल प्राप्त झाले असून अद्याप 120 अहवाल प्रलंबित आहेत. 

शहरातील रुग्णांची दिवसेंदिवस संख्या वाढत चालली आहे. अनेक प्रकारच्या उपाययोजना केल्या जात आहेत. तथापि, नागरिकांनी विनाकारण घराबाहेर पडू नये, असे आवाहन प्रांताधिकारी सचिन ढोले यांनी केले आहे. 

संपादन : श्रीनिवास दुध्याल