कासेगावजवळ भीषण अपघात ! कोल्हापूर जिल्ह्यातील चंदगड येथील पाचजण ठार; अकरा जखमी 

पंढरपूर (सोलापूर) : पंढरपूरला श्री विठ्ठल - रुक्‍मिणी दर्शनासाठी येणाऱ्या कोल्हापूर जिल्ह्यातील चंदगड येथील भाविकांच्या बोलेरो गाडीला अपघात झाला. या अपघातात दोन महिला, दोन पुरुष आणि एक लहान मुलगी अशा पाचजणांचा जागीच मृत्यू झाला; तर तब्बल 11 जण जखमी झाले आहेत. 

हा अपघात आज (शुक्रवारी) सकाळी सहा वाजण्याच्या सुमारास कासेगाव परिसरात (सातवा मैल) घडला. जखमींना येथील शासकीय रुग्णालयात दाखल करण्यात आले आहे. अपघाताची माहिती मिळताच पंढरपूर तालुका पोलिस ठाण्याचे पोलिस निरीक्षक किरण अवचर घटनास्थळी दाखल झाले आहेत. 

याबाबतची माहिती अशी की, चंदगड (कोल्हापूर) येथील 16 भाविक बोलेरो गाडीतून विठ्ठल - रुक्‍मिणी दर्शनासाठी पंढरपूरला येत होते. पंढरपूर अवघ्या हाकेच्या अंतरावर असतानाच कासेगावजवळ रस्त्यावर उभ्या असलेल्या ट्रकला पाठीमागून बोलेरो गाडीने जोरदार धडक दिली. अपघात इतका जोरदार होता, की बोलेरोचा चेंदामेंदा झाला. 
मृतांची ओळख पटवण्याचे काम सुरू आहे. 

पंढरपूर- सांगोला रस्त्यावर आज सकाळी झालेल्या भीषण अपघातातील सर्व मृतांची ओळख पटली आहे. सर्व पाच मृत व्यक्ती कोल्हापूर जिल्ह्यातील चंदगड तालुक्‍यातील बाद्राई कडवळे गावचे आहेत. श्री विठ्ठलाच्या दर्शनासाठी बोलेरो जीपमधून हे सर्व 16 जण पंढरपूरकडे येत असताना हा अपघात झाला. 

अपघातातील मृतांची नावे : सखाराम धोंडीबा लांबोर (वय 50), श्‍यादूबाई लक्ष्मण लांबोर (वय 62), पिंकी ऊर्फ सुनीता ज्ञानू लांबोर (वय 11), नागूबाई काळू लांबोर (वय 62) व तुकाराम खंडू कदम (वय 50). 

अपघातातील अकरा जखमींना पुढील उपचारासाठी सोलापूर येथे हलविण्यात आले आहे. त्यांची नावे पुढीलप्रमाणे : धोंडीबा बापू लांबोर (वय 87), कोंडदेवा बापू लांबोर (वय 7), कोमल बापू लांबोर (वय 7), बबन लांबोर (वय 45), भारती बापू लांबोर (वय 54), रोहित यशवंत कांबळे (वय 20), बापू काळअप्पा लांबोर (45), कोंडीबा विठ्ठल लांबोर (वय 5), काळूलाल लांबोर (वय 70), नागूबाई ज्ञानू कोकरे (वय 50), धोंडीबा सखाराम डोईफोडे (वय 60). 

संपादन : श्रीनिवास दुध्याल