कोरोना रुग्णांच्या उपचारासाठी 'त्यांनी' दिले चार लाख रुपयांचे ऑक्‍सीजन मशीन 

पंढरपूर(सोलापूर) ः कोरोनाच्या पार्श्वभूमीवर येथील विधिज्ञ सारंग आराध्ये व त्यांच्या परिवाराने सुमारे चार लाख रुपये किंमतीचे हाय फ्लो नेसल ही अत्यावश्‍यक ऑक्‍सीजन मशीन पंढरपुरातील रुग्णांसाठी मोफत देणगी म्हणून दिले आहे. येथील अपेक्‍स हॉस्पिटलमध्ये ही मशीन रुग्णांसाठी उपलब्ध करुन देण्यात आली आहे.या मशीनचा येथील रुग्णांना मोठा फायदा होणार आहे. 

हेही वाचाः मोठी ब्रेकींग ! शहरातील पान टपऱ्या सुरू करण्यास परवानगी; या नियमांचे पालन बंधनकारक 

कोरोना विषाणूच्या महामारीमुळे अनेकांचे प्राण गेले आहेत. महामारीमध्ये अधिकाधिक लोकांचे प्राण वाचावेत यासाठी प्रशासकीय पातळीवरुन प्रयत्न सुरु आहेत. रुग्णांसाठी शासकीय व खासगी हॉस्पिटलमध्ये वैद्यकीय सेवा आणि उपकरणे उपलब्ध करुन दिली आहेत. तरीही पंढरपुरातील अनेक रुग्णालयात अत्याधुनिक साधने आणि उपकरणांचा अभाव असल्याने रुग्णांना उपचारासाठी इतत्र जावे लागते. रुग्णांची ही गरज ओळखून येथील विधिज्ञ सारंग आराध्ये व त्यांच्या परिवाराकडून हॉय फ्लो ऑक्‍सीजन मशीन स्वखर्चातून येथील अपेक्‍स हॉस्पिटलमध्ये उपलब्ध करुन दिली आहे. या अत्याधुनिक ऑक्‍सीजन मशीनमुळे रुग्णांचे जीव वाचण्यास मदत होणार आहे. सुमारे चार लाख रुपये किमतीची ही मशीन कोरोना रुग्णांसाठी जीवनदान ठरणारी आहे. 

हेही वाचाः तणावमुक्ती व नवा उत्साह देणारे खेळ कधी सुरू होणार? क्रिडा क्षेत्राला प्रतिक्षा 

येथील सारंग आराध्ये हे मुंबई उच्च न्यायालयात वकीली करतात. त्यांचे पंढरपूरशी असलेले घट्ट नाते या निमित्ताने अधोरेखीत झाले आहे. त्यांनी सामाजिक भावनेतून ही अत्याधुनिक ऑक्‍सीजन मशीन पंढरपूरकरांसाठी भेट दिली आहे. आज प्रांताधिकारी सचिन ढोले, नगरपालिकेचे मुख्याधिकारी अनिकेत मानोरकर, उपविभागीय पोलिस अधिकारी डॉ.सागर कवडे, डॉ.अरिफ बोहरी, डॉ. प्रविदत्त वांगीकर, डॉ.अभिजित माचणूरकर, डॉ.संदीप गवळी, डॉ.मंदार सोनवणे, डॉ.करण व्होरा यांच्या उपस्थितीत ही मशीन अपेक्‍स हॉस्पिटलच्या व्यवस्थापनाकडे सुपूर्त केली. पंढरपूर शहरात कोरोनाचा प्रादुर्भाव वाढू लागला आहे. कोरोना रुग्णांना ऑक्‍सीजन मिळावा आणि त्यातून त्यांचे जीव वाचावेत. या यंत्रणेनमुळे रुग्णाला प्रति सेंकदाला 60 लीटर ऑक्‍सीजन मिळणार आहे. कोरोना रुग्णांचे प्राण वाचवण्यासाठी या यंत्रणेची मदत होणार असल्याचे सतीश आराध्ये यांनी सांगितले. 
 
संपादन ः प्रकाश सनपूरकर