पोलिसांच्या मारापेक्षा घर चालवणे जास्त कठीण

सोलापूरः "सकाळी मासे लांब अंतरावरून उधारीवर आणायचे अन्‌ विकण्याच्या धडपडीत वेळ अपुरा पडल्याने पोलिसांचा मार खाल्ल्याशिवाय काही उपाय राहिला नाही. पण, पोलिसांच्या मारापेक्षा घर चालवण्याचे संकट मोठे आहे', अशी भावना मासे विक्रेता विशाल गायकवाड यांनी व्यक्त केली. 

हेही वाचाः चंद्रदर्शन झाल्याने सोमवारी रमजान ईद 

मरिआई चौकाजवळ असलेल्या रेल्वे पुलाच्या वर विशाल गायकवाड मासे विकतात. लॉकडाउनपूर्वी त्यांची 200 ते 300 रुपये कमाई व्हायची. नंतर लॉकडाउनमुळे धंदा बंद पडला. काही दिवस घरात बसून काढले. 

हेही वाचाः सोलापूरातील सर्व दवाखान्यात होणार उपचार 

घरात आजारी वडील, आई, दोन भाऊ यांचा सर्व भार विशालच्या मासे विक्रीवर आहे. इंदापूर येथून दररोज मासे आणून येथे रस्त्यावर विकण्याचे काम करतात. आधी इंदापुरातून टेम्पोने मासे वाहतूक व्हायची. पण, लॉकडाउनमुळे ती वाहतूक बंद पडली. लॉकडाउनच्या कालावधीत घर चालवण्यासाठी जवळ असलेले पैसे खर्च झाले. स्वस्त धान्य दुकानावर माल मिळेल या आशेने ते गेले. तर त्यांच्याकडे मोठ्या आर्थिक उत्पन्न गटाचे केशरी कार्ड असल्याने त्यांना धान्य मिळाले नाही. 
तेव्हा त्यांनी दुचाकीवर जाऊन इंदापुरातील मासे पुरवठादाराला गाठले. त्यांना विनंती करून उधारीवर मासे मागितले. मासे विकून त्याचे पैसे देण्याचे त्यांनी मान्य केले. थोडे फार मासे मिळाले तर विकण्यासाठी ग्राहक कमी झाले. रस्त्यावरून जेवढे ग्राहक अधूनमधून जातील, तेवढ्यावरच त्यांची विक्री सुरू आहे. ही कमाई कधी 100 ते 150 रुपयांपर्यंत जाते. त्यातील मासे खरेदीचा मोबदला देऊन 50 रुपयांची कमाई देखील होईनाशी झाली आहे. 
सकाळी मासे आणून त्याची विक्री होण्याआधीच लॉकडाउनमधील विक्रीची वेळ संपत असल्याने पोलिसांचा मार खाण्याची वेळ येते. पण, तरीही आणखी काही मासे विकले तर काही खर्च निघेल म्हणून त्यांची धडपड सुरू आहे. पोलिसांच्या मारापेक्षा घराचा खर्च चालवण्याची चिंता मोठी आहे, असे त्यांनी सांगितले.