असाही निर्णय ! प्रवासी नसल्यास जागेवरच थांबणार लालपरी 

तात्या लांडगे
शुक्रवार, 28 फेब्रुवारी 2020

विभाग नियंत्रकांना निर्णय घेण्याचा अधिकार 
राज्यातील बहूतांश खेड्यापाड्यातील प्रवाशांसाठी लालपरी बारा महिने सेवा बाजवत आहे. सुरक्षित प्रवासासाठी प्रवाशांनी लालपरीचा वापर करणे काळाची गरज आहे. दरम्यान, एखाद्या बसमध्ये प्रवाशांची संख्या पुरेशी नसल्यास प्रवाशांची संख्या समानधारक होईपर्यंत संबंधित बस हलवू नये, असा नियम आहे. त्याबाबतचा निर्णय संबंधित विभाग प्रमुखांनी घ्यायचा आहे. 
- राहूल तोरो, वाहतूक व्यवस्थापक, राज्य परिवहन महामंडळ 

सोलापूर : उन्ह असो की पाऊस, सर्वच ऋतूंमध्ये सर्वसामान्यांसाठी लालपरी खेड्यापाड्यापर्यंत सेवा देत आहे. मात्र, खासगी बेशिस्त वाहतुकीमुळे लालपरीची मागील काही वर्षांपासून दरवर्षी अंदाजित सहाशे कोटींचा आर्थिक भुर्दंड सोसत आहे. या पार्श्‍वभूमीवर आता लांब पल्ल्याच्या एसटी बसमध्ये पुरेसे प्रवासी नसल्यास संबंधित बस जागेवरच थांबविली जाणार असून समाधानकारक प्रवाशी मिळाल्यानंतरच ती हलविली जाणार आहे. त्याची जबाबदारी संबंधित विभाग प्रमुखांवर सोपविण्यात आली आहे. 

हेही नक्‍की वाचा : अवकाळीच्या मदतीपासून बळीराजा दूरच ! नऊशे कोटींचे वाटपच नाही 

चालक, वाहकांसह लालपरीत पाच ते दहा प्रवासी असतानाही बस नियोजित वेळेनुसार धावतात. त्यामुळे उत्पन्नाच्या तुलनेत खर्चच मोठा होवू लागला आहे. दुसरीकडे 
महाराष्ट्र राज्य परिवहन महामंडळाच्या ताफ्यात सोळा हजार बस असून त्यासाठी एक लाख तीन हजार कर्मचारी कार्यरत आहेत. इंधन, दुरुस्ती, वेतनावरील खर्चाच्या तुलनेत खर्चच वाढला आहे. शासनाकडून मिळणाऱ्या अनुदानावरच लालपरीची वाटचाल सुरु आहे. मागील काही वर्षांपासून लालपरी आर्थिक अडचणीची शर्यत पार करीत प्रवाशांची सेवा करीत आहे. राज्यातील बहूतांश खेड्यापाड्यापर्यंत पोहचलेली लालपरी आता आर्थिक अडचणींचा सामना करीत असल्याचे चित्र आहे. या पार्श्‍वभूमीवर परिवहन मंत्री अनिल परब यांनी मार्च ते एप्रिल या कालावधीत प्रायोगिक तत्त्वावर उत्पन्न वाढीसाठी विशेष मोहीम हाती घेतली आहे. त्यानुसार प्रत्येक विभागांना उत्पन्न वाढीचे उद्दिष्टे देण्यात आले असून उद्दिष्ट पूर्ण करणाऱ्या विभागांना दरमहा दोन लाखांचे बक्षिसही दिले जाणार आहे. 

हेही नक्‍की वाचा : स्मार्ट सिटीतून 'या' गावांना मिळणार पाणी 

राज्य परिवहन महामंडळाचा पसारा 
एकूण विभाग 
31 
एकूण बस 
16,000 
कर्मचारी 
1.04 लाख 
दरवर्षीचा सरासरी भुर्दंड 
600 कोटी


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Lalpari will stop at the place if there is no traveler