महावितरण : तक्रार निवारणासाठी आता वेबिनार 

सोलापूर : कोरोना विषाणूच्या प्रादुर्भावामुळे सध्या लॉकडाउन सुरू असल्याने विविध तक्रार निवारणासाठी महावितरणच्या सर्व ग्राहकांशी संवाद साधण्यासाठी वेबिनार किंवा व्हिडिओ कॉन्फरन्सिंगचे आयोजन करण्यात येणार आहे. पुणे प्रादेशिक विभागात त्याची अंमलबजावणी करण्याचे आदेश ऊर्जामंत्री डॉ. नितीन राऊत व प्रादेशिक संचालक अंकुश नाळे यांनी दिले आहेत. 

हेही वाचा : सोलापूर जिल्ह्यातील महाविद्यालयांनी जूनअखेर कळवावेत अंतर्गत गुण 

ग्राहकांशी व्हिडिओ कॉन्फरन्सिंगद्वारे संवाद 
कोरोना विषाणूमुळे राज्यात लॉकडाउन सुरू आहे. या पार्श्‍वभूमीवर सर्व वर्गवारीतील ग्राहकांशी व्हिडिओ कॉन्फरन्सिंगद्वारे थेट संवाद साधून वीजपुरवठा, वीजबिल, वीजयंत्रणेची दुरुस्ती आदींबाबत गाऱ्हाणी, प्रश्‍न, अपेक्षा व अडचणी जाणून घेऊन त्याचे निराकरण करण्याचे तसेच ग्राहकांना महावितरणच्या विविध सेवांची माहिती उपलब्ध करून देण्यासही सांगितले आहे. या अनुषंगाने पुणे प्रादेशिक संचालक नाळे यांनी मुख्य अभियंता व अधीक्षक अभियंता यांना विभाग व उपविभागस्तरावर व्हिडिओ कॉन्फरन्सिंगचे आयोजन करावे आणि वीजग्राहकांशी संवाद साधून त्यांच्या विविध तक्रारींचे निवारण करण्याचे आदेश दिले आहेत. तसेच श्री. नाळे स्वतः पुणे, सोलापूर, सातारा, सांगली व कोल्हापूर जिल्ह्यांतील औद्योगिक व अतिमहत्त्वाच्या ग्राहकांशी संवाद साधणार आहेत. 

हेही वाचा : बळीराजासाठी खुषखबर...! कर्जमाफीतील 14 लाख लाभार्थींच्या याद्या तयार 

घेतला कामांचा आढावा 
वीजग्राहकांसाठी संबंधित मंडलचे अधीक्षक अभियंता हे व्हिडिओ कॉन्फरन्सिंगचे आयोजन करणार आहेत. व्हिडिओ कॉन्फरन्सिंगच्या आयोजनाची तारीख व वेळेची पूर्वमाहिती संबंधित स्थानिक कार्यालयाकडून वीजग्राहकांना कळविण्यात येणार आहे. 
याआधी श्री. नाळे यांनी व्हिडिओ कॉन्फरन्सिंगद्वारे महावितरणचे सुमारे एक हजार 800 अभियंता, अधिकारी व कर्मचाऱ्यांशी तसेच रीडिंग व बिल वाटप एजन्सी, विविध योजनांमधील कंत्राटदार आदींशी थेट संवाद साधून कामांचा आढावा घेतला आहे. यासोबतच पुणे परिमंडलाचे मुख्य अभियंता सचिन तालेवार व गणेशखिंड मंडलचे अधीक्षक अभियंता पंकज तगलपल्लेवार यांनी 180 सोसायट्यांच्या फेडरेशनच्या पदाधिकाऱ्यांशी स्थानिक अभियंत्यांसमवेत नुकताच वेबिनारद्वारे संवाद साधला आहे.