एमआयएमचा दत्तात्रय सावंत यांना पाठिंबा, शहराध्यक्ष फारूक शाब्दी : सोलापूर महापालिका निवडणुकीत एमआयएम घडवेल चमत्कार 

सोलापूर : विधान परिषदेच्या पुणे शिक्षक मतदारसंघासाठी अपक्ष उमेदवार व माजी आमदार दत्तात्रय सावंत यांना पाठिंबा दिल्याची घोषणा शहराध्यक्ष फारूक शाब्दी यांनी आज पत्रकार परिषदेत केली. सर्वसामान्य शिक्षकांच्या मदतीला धावून जाणारे, शिक्षकांच्या अडी-अडचणी सोडविणारे, धर्म निरपेक्ष व सर्वसमावेश उमेदवार म्हणून आम्ही सावंत यांना पाठिंबा दिल्याचे त्यांनी सांगितले. 

एमआयएमच्या सोलापूर शहर कार्यालयात आज सायंकाळी झालेल्या बैठकीला एमआयएमच्या नगरसेविका वाहिदा भंडाले, नगरसेवक गाझी जहागिरदार, महाराष्ट्र राज्य शाळा कृती समितीचे जिल्हाध्यक्ष गुरुनाथ वांगीकर, शहराध्यक्ष सरदार नदाफ, साजिद शहाभाई, कृती समितीचे दक्षिण सोलापूर तालुकाध्यक्ष सुरेश नलुरे, शिवानंद तेगीनकेरी यांची प्रमुख उपस्थिती होती.

शहराध्यक्ष शब्दी म्हणाले, विधानपरिषदेच्या पदवीधर निवडणुकीत मतदारांना जो उमेदवार योग्य वाटेल त्याला एमआयएमच्या मतदारांनी मतदान करावे. शिक्षकसाठी मात्र अपक्ष उमेदवार दत्तात्रय सावंत यांनाच मतदान करावे. बिहार विधानसभा निवडणुकीत एमआयएमला मिळालेल्या घवघवीत यशामुळे संपूर्ण देशातील एमआयएमच्या कार्यकर्त्यांचा आत्मविश्वास वाढला आहे. 2022 मध्ये होणाऱ्या सोलापूर महापालिकेच्या निवडणुकीत एमआयएम चमत्कार करून दाखवेल असा विश्वासही शहराध्यक्ष शाब्दी यांनी व्यक्त केला. महापालिकेच्या सर्वच्या सर्व जागा लढण्यासाठी एमआयएमने तयारी सुरू केल्याचेही त्यांनी सांगितले.