"या' जिल्ह्यात अनुकंपा भरतीसाठी नवा निर्णय 

सोलापूर ः जिल्हा परिषदेच्यावतीने अनुकंपा भरती केली जाणार आहे. शासनाच्या दिलेल्या सूचनांनुसार 20 टक्के भरती केली जाणार आहे. त्याची प्रक्रिया पूर्ण करण्यासाठी संकेतस्थळावर प्रसिद्ध केलेल्या यादीतील दहावी उत्तीर्णच्या पुढे शैक्षणिक पात्रता असलेल्या उमेदवारांनी कागदपत्रांच्या पडताळणीसाठी मंगळवारी (ता. 25) सकाळी 11 वाजता उपस्थित राहण्याचे आवाहन प्रशासनाने केले आहे. 

हेही वाचा ः तीन वर्षापासून विद्यार्थ्यांना मिळेना बक्षीस 

उमेदवारांच्या कागदपत्रांची पडताळणी जिल्हा परिषदेच्या यशवंतराव चव्हाण सभागृहात केली जाणार आहे. किमान दहावी व त्यापुढील शैक्षणिक पात्रता असलेल्या उमेदवारांनीच या पडताळणीसाठी उपस्थित राहण्याच्या सूचना दिल्या आहेत. या पडताळणी शिबिरामध्ये जिल्हा परिषद सेवेतील कर्मचाऱ्याच्या मृत्यूनंतर एका वर्षाच्या आत अनुकंपा नोकरीसाठी अर्ज केलेला असावा. सज्ञान झाल्यानंतर एक वर्षाच्या आता अर्ज केलेला असावा. कुटुंबातील वारसाचे प्रमाणपत्र, अनुकंपा नोकरी देण्यासाठी कुटुंबातील अन्य वारसांचे संमतिपत्र, कुटुंबातील कोणतेही सदस्य शासकीय-निमशासकीय सेवेत नसल्याबाबतचे प्रतिज्ञापत्र, कर्मचाऱ्याच्या पत्नीने अनुकंपासाठी अर्ज केला असल्यास पुनर्विवाह न केल्याचे प्रतिज्ञापत्र, शैक्षणिक अर्हता, जन्म तारखेशी संबंधित कागदपत्रे, जात प्रमाणपत्र व जात वैधता प्रमाणपत्र, कर्मचाऱ्याच्या मृत्यूपश्‍चात कुटुंब निवृत्ती वेतन व मिळालेल्या इतर लाभाचे आदेश, कर्मचाऱ्याचा मृत्यू दाखला या सगळ्या कागदपत्रांची तपासणी केली जाणार आहे. उमेदवारांनी वरील कागदपत्रांच्या मूळ प्रतीसह मंगळवारी (ता. 25) होणाऱ्या पडताळणीसाठी उपस्थित राहायचे आहे. 

हेही वाचा ः मुस्लिम महिलांनी केला शिवरायांचा जयजयकार 

तर अनुकंपा नियुक्तीचा विचार नाही 
प्रशासनाच्यावतीने मंगळवारी (ता. 25) ठेवलेल्या कागदपत्रांच्या पडताळणीसाठी उमेदवारांनी न चुकता उपस्थित राहायचे आहे. पडताळणीच्या दिवशी उपस्थित न राहिल्यास संबंधित उमेदवारांच्या नियुक्तीचा विचार केला जाणार नसल्याचेही सामान्य प्रशासन विभागाने म्हटले आहे. तशाप्रकारची पत्रही संबंधित उमेदवारांना देण्यात आली आहेत.