करमाळा तालुक्‍यात पावसाने मका पीक तरारून येताच लष्करी अळीचा प्रादुर्भाव 

केत्तूर(सोलापूर): जून अखेर तालुक्‍यात झालेल्या मुसळधार पावसाने तालुक्‍यातील उडीद,बाजरी,मका आदी पिके जोमदार आली आहेत. परंतु गतवर्षी प्रमाणे यंदा देखील मका पिक जोमात असताना अमेरिकन लष्करी अळीने त्यावर हल्ला चढवल्याने शेतकरी संकटात सापडला आहे. 

हेही वाचाः अक्कलकोटमध्ये रॅपिड अँटिजन टेस्टमध्ये आढळले चार पॉझिटिव्ह 

खरिपातील चारा उपलब्ध करून देणारे मका हे एक नगदी पीक आहे. त्यावर पडलेल्या लष्करी अळीचा नायनाट करण्यासाठी शेतकऱ्यांनी फवारणी सुरू केली आहे. 
करमाळा तालुक्‍यातील कोर्टी, हुलगेवडी, गोरेवडी, पोंधवडी, विहाळ, राजुरी, रावगावं, मोरवड, विट, उमरड, अजनडोह, सावडी, पोफळज आदी गावामध्ये अमेरिकी लष्करी अळीचा प्रादुर्भाव आढळून आला आहे. 

हेही वाचाः जूनमध्ये पावसाने केली सरासरी पूर्ण 

मका लागवडीपासून पंधरा दिवसांनंतर लष्करी अळीचे अंडी घालणे व अळ्या तयार होणे प्रक्रिया सुरू होते. मक्‍याच्या कोवळ्या पानांवर पांढरे ठिपके तसेच छिद्रे पडलली दिसून आले आहे. तर काही ठिकाणी मका पिकाचा शेंडाच या अळीने नष्ट केल्याचे दिसत आहे. महागड्या औषधावर खर्च करायला परवडत नसल्याचे शेतकऱ्यांनी सांगितले. 

औषधांची फवारणी करावी 
गेल्यावर्षी प्रमाणेच यंदा देखील मका पिकावर अळीचा प्रादुर्भाव दिसण्यास सुरुवात झाली आहे. शेतकऱ्यांनी दीड महिन्याच्या आत योग्य त्या औषधाची फवारणी करून घ्यावी." 
-सूरज पाटील, तालुका कृषी अधिकारी,करमाळा. 

शेंडे खाणारी अळीने नुकसान 
"मी यंदा आठ पिशव्या मका केली आहे. पिक उगवल्यानंतर या एक महिन्याच्या मकावर शेंडा खाणारी अळी पडली आहे. त्यामुळे पूर्ण पीक नष्ट होण्याची शक्‍यता आहे. कृषी विभागाने सर्वेक्षण करून उपाय सुचवावेत आणि प्लॉटचे पंचनामे करावेत. 
- गणेश खुळे,गुलमोहरवाडी, ता.करमाळा 
 

संपादनः प्रकाश सनपूरकर