"या' बाजार समितीत औषधी वृक्षांची लागवड 

सोलापूर ः बार्शी शहरातील तुळजापूर रस्त्यावर असलेल्या कृषी उत्पन्न बाजार समितीत दुर्मिळ व नामशेष होत असलेल्या तसेच औषधी गुणधर्म असलेल्या विविध 27 प्रजातींच्या 164 वृक्षांची लागवड केली. मागील वर्षी मोठ्या प्रमाणावर वृक्ष लागवडी केल्यानंतर आता औषधी गुणधर्म असलेल्या वृक्षांच्या लागवडीमुळे बाजार समितीचा चेहरामोहरा बदलत आहे. बाजार समिती परिसर पर्यावरणपूरक व हरितक्रांती होत असल्याची माहिती सभापती रणवीर राऊत यांनी दिली. 

हेही वाचा ः दोन बसची समोरासमोर धडक; सोलापुरात एक बस उलटली 

बाजार समितीत सत्तांतर होऊन राऊत गटाची सत्ता येताच बाजार समितीच्या आवारात वृक्षलागवड व संगोपनाचा संकल्प करत मागील वर्षीपासून विविध रोपांची लागवड केली होती. पर्यावरणाच्या दृष्टिकोनातून वृक्ष लागवड व संगोपनाचे महत्त्व पटवून देत त्यांनी बाजार समितीतील विविध घटकांना या मोहिमेत सहभागी करून घेत आपल्या व्यावसायिक गाळ्यासमोरील वृक्षाच्या संगोपनाची जबाबदारी त्यांच्यावर सोपवण्यात आली. 

हेही वाचा ः "सारथी' नाही तर तुम्ही नवीन पारथी काढा ः चंद्रकांत पाटील 

परवाना नूतनीकरणवेळी व्यापाऱ्यांना वृक्षसंगोपनाच्या अनेक अटी समितीने घातल्या. याचा परिणाम आता दिसू लागला आहे. बाजार समितीच्या आवारात आता ही झाडे बहरत आहेत. संचालक रावसाहेब मनगिरे यांनी सुमारे पाच एकर परिसराच्या कुंपणाभोवती औषधी गुणधर्म असलेल्या व दुर्मिळ जातीच्या वृक्षांची लागवड करण्याची संकल्पना मांडली. सभापती राऊत यांच्यासह संचालकांनीही या संकल्पनेस प्रतिसाद दिला. त्यानुसार बाजार समितीच्या आवारात पदाधिकाऱ्यांच्या हस्ते 27 प्रकारच्या 164 रोपांची लागवड करण्यात आली. सभापती रणवीर राऊत, उपसभापती झुंबर जाधव, संचालक चंद्रकांत मांजरे, अभिमन्यू डमरे, अरुण येळे, रावसाहेब मनगिरे, राजेंद्र गायकवाड, अनिल जाधव, कुणाल घोलप, बाजार समितीचे सचिव तुकाराम जगदाळे उपस्थित होते. पाण्याची बचत व्हावी यासाठी ठिबक सिंचनाद्वारे पाण्याची सोय केली आहे. तसेच या झाडाशेजारी ट्रॅक विकसित करून त्याशेजारी फुलझाडे लावण्याचा विचार असल्याचे मनगिरे यांनी सांगितले.