पाहा "यांच्या'कडून कशी होतेय पशुपालकांची लूट

सांगोला (सोलापूर) : संपूर्ण पश्‍चिम महाराष्ट्रात सांगोला येथील जनावरांचा बाजार प्रसिद्ध आहे. प्रत्येक रविवारी जनावरांच्या बाजारात मोठ्या प्रमाणात खरेदी-विक्रीसाठी दूरवरून शेतकरी व व्यापारी येत असतात. परंतु, सांगोल्याच्या मुख्य रस्त्यावर रविवारीच वाहतूक पोलिसांचा जनावरे घेऊन येणाऱ्या-जाणाऱ्या वाहनधारकांना मोठ्या प्रमाणात त्रास सहन करावा लागत आहे. वाहतूक नियमावलीच्या नावाखाली थेट त्रास पशू उत्पादकांनाच होत आहे.

हेही वाचा - पुतण्याकडे "ओबीसी' तर खासदारांकडे "एससी'चे प्रमाणपत्र

वाहने अडवून दाखवला जातो नियमांचा बडगा
आठवडा बाजारात जनावरांची मोठ्या प्रमाणात खरेदी-विक्री होत असते. सांगोल्यातील जनावरांचा बाजार हा पश्‍चिम महाराष्ट्रात खिलार बैलांच्या जातीच्या जनावरांसाठी प्रसिद्ध आहे. खिलार बैलांबरोबरच सध्या बाजार जर्सी गायी व म्हशींसाठीही प्रसिद्ध आहे. या बाजारासाठी इतर जिल्ह्यांतून व परिसरातील तालुक्‍यांतून मोठ्या प्रमाणात शेतकरी जनावरांच्या खरेदी-विक्रीसाठी येत असतात. शेतकऱ्यांबरोबरच कर्नाटकातील व्यापारीही या ठिकाणी जनावरे घेऊन खरेदी-विक्रीसाठी येतात. प्रत्येक रविवारी भरणाऱ्या जनावरांच्या बाजारात सांगोल्यात येणाऱ्या मुख्य रस्त्यांवरून म्हणजे पंढरपूर - मिरज - मंगळवेढा अशा रस्त्यांवर वाहतूक पोलिस असतात. शहराच्या एक किलोमीटर बाहेर जनावरे घेऊन येणाऱ्या व जाणाऱ्या टेम्पो, टमटम, पिकअप आदी वाहनांना अडवून वाहतूक नियमावलीचा बडगा दाखवला जातो. या नियमावलीचा त्रास नको म्हणून वाहनधारकही यातून चिरीमिरी देऊन आपली सुटका करून घेत असतात. परंतु, वाहनधारक हे पैसे भाड्यातून न देता शेतकऱ्यांकडून वसूल करतात. त्यामुळे वाहतूक पोलिसांच्या नियमावलीच्या नावाखाली होणाऱ्या लुटीचा त्रास थेट शेतकऱ्यांना होत असल्याचे शेतकरी सांगतात.

हेही वाचा - मेंढीची किंमत ऐकून तुम्हीही व्हाल चकित

नियमानुसार कारवाई होणार
ज्या दिवशी बाजार असतो त्या दिवशी वाहतुकीच्या नियमानुसार कारवाईही होणार. या कारवाईचा येथील जनावरांच्या बाजारावर काहीही परिणाम होणार नाही. नियमानुसार होत नसल्यास याची चौकशी केली जाईल.
- राजेश गवळी,
पोलिस निरीक्षक, सांगोला