सांगोला तहसील कार्यालयातील सातजण कोरोनाबाधित; प्रांताधिकारी, तहसीलदार होम क्वारंटाइन 

सांगोला (सोलापूर) : सांगोला तहसील कार्यालयाच्या विविध विभागातील सात अधिकारी व कर्मचारी पॉझिटिव्ह आल्याने सांगोल्याचे तहसीलदार यांच्यासह विविध विभागातील अधिकारी होम क्वॉरंटाईन झाले आहेत. तालुक्‍यात आज सर्वाधिक 78 जण पॉझिटिव्ह आले असून एकूण रुग्णांची संख्या 1197 झाली असल्याची माहिती उपविभागीय अधिकारी उदयसिंह भोसले यांनी दिली. 
तालुक्‍यात आज 451 रॅपिड अँटीजेन टेस्ट घेण्यात आल्या. यामध्ये 78 जणांच्या पॉझिटिव्ह व 373 जणांचे निगेटिव्ह अहवाल प्राप्त झाले आहेत. पॉझिटिव्ह रुग्णांमध्ये सांगोला शहर 21, यलमार मंगेवाडी सहा, वाढेगाव दोन, वाकी शिवणे दोन, महूद 17, राजुरी तीन, पारे चार, जवळा दहा पाचेगाव खु. दोन तर वाणी चिंचाळे, मेडशिंगी, राजापूर, आलेगाव, कोळा, अकोला, देवळे, चिणके, नाझरे व डिकसळ येथील प्रत्येकी एका रुग्णाचा समावेश आहे. आज 17 जणांना उपचारानंतर घरी सोडण्यात आले असून आजअखेर 682 रुग्णांवर उपचार सुरू असल्याची माहिती उपविभागीय अधिकारी उदय भोसले यांनी दिली. उद्यापासून (ता. 15) पासून सांगोल्यातील वाढत्या कोरोना रुग्णांच्या संख्येमुळे दहा दिवसाचा कडक जनता कर्फ्यू लागू करण्यात आला आहे. सध्या नगरपालिका, तहसील कार्यालय, दुय्यम निबंधक कार्यालय, सेतु कार्यालय अशा विविध विभागातील अधिकारी व कर्मचारी पॉझिटिव्ह आले आहेत. 
मंगळवेढ्याचे उपविभागीय अधिकारी उदयसिंह भोसले हे शासकीय कामकाजानिमित्त सांगोला येथे आले होते. यावेळी झालेल्या बैठकीत पॉझिटिव्ह अधिकाऱ्यांचा त्यांचा संपर्क झाला असल्याने सध्या तेही सध्या होम क्वॉरंटाईन झाले आहेत. 

संपादन : वैभव गाढवे