सोलापूर दूध संघाची सुनावणी 27 फेब्रुवारीला 

सोलापूर : सोलापूर जिल्हा सहकारी दूध उत्पादक व प्रक्रिया संघाच्या आर्थिक कारभाराबाबत दुग्धचे पुणे विभागाचे विभागीय उपनिबंधक सुनील शिरापूरकर यांनी दूध संघाला कारणे दाखवा नोटीस बजावली होती. या नोटीसवर आज सुनावणी झाली असून पुढील सुनावणीसाठी 27 फेब्रुवारी ही तारीख देण्यात आली आहे. 
जिल्हा दूध संघाचे संचालक मंडळ बरखास्त करून संघावर प्रशासक नियुक्त का करू नये? याबाबत खुलासा करण्याची सूचना दूध संघास करण्यात आली आहे. या नोटीस वर आज विभागीय उपनिबंधक शिरापूरकर यांच्याकडे सुनावणी झाली. 
हेही वाचा - हालचाली सुरू... यंदाही होणार कृत्रिम पावसाचे प्रयोग 
म्हणणे मांडण्यासाठी दूध संघाने एक महिन्याची मुदतवाढ मिळावी अशी मागणी आजच्या सुनावणीत केली आहे. दूध संघाची ही मागणी फेटाळत दूध संघाला त्यांचे म्हणणे मांडण्यासाठी दहा दिवसांची मुदत देण्यात आली आहे. 27 फेब्रुवारी रोजी दुपारी एक वाजता या नोटीसवर आता सुनावणी होणार आहे. 
दूध संघाचे वकीलपत्र ऍड. उमेश मराठे यांनी स्वीकारले असून आजच्या सुनावणीसाठी ऍड. मराठे यांचे सहाय्यक ऍड. बाळकृष्ण वाकचौरे व जिल्हा दूध संघाचे व्यवस्थापकीय संचालक सतीश मुळे उपस्थित होते. नोटीसमध्ये दिलेल्या मुद्द्यांचा अभ्यास करण्यासाठी व त्यावर आमचे म्हणणे सादर करण्यासाठी आम्हाला एक महिन्याची मुदत द्या अशी मागणी दूध संघाच्यावतीने करण्यात आली होती. एक महिन्याची मुदत देता येत नाही असे कारण सांगून विभागीय उपनिबंधक शिरापूरकर यांनी दूध संघ व संचालक मंडळाला दहा दिवसांची मुदत दिली आहे.