सोलापूर - पुणे महामार्गावर भरधाव टेम्पो चालकाने वाहतूक पोलिसाला उडविले; जागीच मृत्यू

सोलापूर : तपासणीसाठी थांबण्याचा इशारा केल्यानंतरही भरधाव वेगाने पळून जाणाऱ्या ट्रक चालकाने ट्रक वाहतूक पोलिसांच्या अंगावर घातल्याने पोलिसाचा मृत्यू झाल्याची घटना घडली आहे. ही घटना रविवारी सायंकाळी सोलापूर - पुणे महामार्गावरील वरवडे टोल नाक्‍याजवळ घडली. 

सागर चोबे असे या घटनेत मरण पावलेल्या महामार्ग पोलिस कर्मचाऱ्याचे नाव असून याबाबत टेंभुर्णी पोलीस ठाण्यात गुन्हा दाखल करण्याचे काम सुरू असून ट्रक चालक नवनाथ बिबटे ( रा. परळी) यास पोलिसांनी ताब्यात घेतले आहे. 

हेही वाचाः सर्वोपचार रुग्णालयाचे वैद्यकीय अधिष्ठाता म्हणाले धुळीमुळे वाढेल कोरोना ! प्रदूषण मंडळाचे महापालिकेस पत्र 

रविवारी महामार्ग पोलीस उपनिरीक्षक विजयकुमार लट्टे व त्यांच्या पथकातील सहा ते सात कर्मचारी हे वरवडे टोलनाक्‍याजवळ वाहनांची तपासणी करीत होते. सांयकाळच्या सुमारास नवनाथ गुट्टे हा त्याच्या ताब्यातील आयशर ट्रक हैदराबाद वरून पुण्याकडे घेऊन जात होता. वरवडे टोलनाक्‍याच्या अलीकडे पोलीस शिपाई सागर चोबे याने बिबटेच्या ताब्यातील ट्रकला थांबण्याचा इशारा केला असतात त्याने ट्रक न थांबविता तसाच पोलीस कर्मचाऱ्याच्या अंगावरुन घातला आणि पळून जाऊ लागला. या दुर्घटनेत पोलीस शिपाई सागर चोबे हे गंभीर जखमी होऊन जागीच मरण पावले असून इतर पोलिस कर्मचारी व अधिकाऱ्यांनी टोल नाक्‍यावर ट्रक ताब्यात घेऊन ट्रक चालक गुट्टे यास ताब्यात घेतले. त्याला टेंभुर्णी पोलिसांच्या स्वाधीन करण्यात आले आहे. याबाबत गुन्हा दाखल करण्याचे काम रात्री उशिरापर्यंत सुरू आहे.
 

 हेही वाचा ः व्यायामासाठी सायकल पुन्हा ट्रेंडमध्ये ; ग्रामीण भागातही वाढला वापर