स्मृतीवनाच्या हिरवाईत सुगरण, होला व मुनिया पक्ष्यांची घरटी बांधण्याची लगबग 

सोलापूरः परिसरात झालेल्या जोरदार पावसासोबत शहरातील स्मृतीवनाचा परिसर हिरवाईने नटला आहे. अनेक प्रकारची रानफुले या परिसरात फुलली आहेत. अनेक प्रकारच्या पक्ष्यांची घरटी दिसु लागली आहेत. सुगरण, होला, मुनिया व चश्‍मेवाला या प्रकारच्या पक्ष्यांचा विणीचा हंगाम सुरु झाल्याने आता या भागात झाडांवर बांधलेली घरटी लक्ष वेधून घेत आहेत. 

हेही वाचाः दहा जुलैची अधिसुचना करा रद्द, अन्यथा 10 ऑगस्टपासून आंदोलन; कोणी दिला इशारा? वाचा 

मागील काही दिवसापासून होत असलेल्या पावसामुळे शहरातील स्मृतीवनाचा परिसर हिरवाईने नटला आहे. उमलेली रानफुले व पक्ष्यांच्या चिवचिवाटाने हा परिसर अगदी फुलून गेला आहे. शहरातील स्मृतीवनाच्या परिसरात पशुपक्ष्यांचा मुक्त संचार असतो. या ठिकाणी वृक्षांची मोठी संख्या आहे. या वर्षी पावसाने अगदी लवकरच हजेरी लावली. सतत सुरू असलेल्या पावसाने हा जंगल परिसर हिरवागार झाला आहे. या परिसरात चालण्यासाठी असलेल्या रस्त्यांच्या कडेची बाजू हिरवी झाली आहे. दिनानाथ, कुसळी गवत आणी शेडा असे गवताचे प्रकार पाहण्यास मिळत आहेत. 

हेही वाचाः सोलापूरच्या ग्रामीण भागात एकाच दिवशी कोरोनाने घेतला नऊ जणांचा बळी 

त्यासोबत रान फुलांचा देखील बहर आला आहे. रानतीळ, इचका, मुकन, दगडी फुल, सोनकी, रुई, अलमंडा, शंखपुष्पी, गौरी चौरी, वेलतार, बिट्टी, शेंद्री या सारख्या अनेक रानफुले अगदी बहरून आली आहेत. निरगुडी, बहावा, अडुळसा, रातराणी अशा झाडांपैकी काही झाडांना बहर आला आहे. पाऊस पडला की वर्षायू असलेल्या रानफुलाची रोपे तरारली आहेत. त्यांच्या फुलांच्या बहराने हिरव्या गवतामध्ये दिसणारी ही फुलांची बहार लक्ष वेधून घेणारी आहे. 

स्मृतीवनाच्यालगत असलेल्या छत्रपती संभाजी महाराज तलावात पावसाने पाणीसाठा वाढला आहे. त्यामुळे पाणपक्षी देखील विपूल प्रमाणात आहेत. या स्मृतीवनाच्या परिसरात सुगरण, चश्‍मेवाला, मुनीया, होला अशा पक्ष्यांची घरटी दिसू लागली आहेत. तलावामध्ये मंचक, पांढऱ्या छातीची पाणकोंबडी, हळदीकुंकू असे पाणपक्ष्यांचे प्रकार सहज दिसतात. हा परिसर बंदिस्त असल्याने अगदी मानवी हस्तक्षेप कमी असल्याने पक्ष्यांची वस्ती कायम असते. 

पक्ष्यांचा वावर वाढतोय 
यावर्षी अगदी सुरवातीपासून चांगला पाऊस झाल्याने स्मृतीवनाच्या परिसर हिरवागार झाला आहे. लगत असलेल्या तलावामूळे इतर पक्ष्यांप्रमाणे पाणपक्ष्यांची देखील घरटी दिसून येतात. 
- संजय भोईटे, निसर्ग अभ्यासक.