सासरच्या त्रासाला कंटाळून जैनवाडीत विवाहितेची आत्महत्या

पंढरपूर (सोलापूर) : स्वयंपाक नीट करता येत नाही, लग्नात जावयाचा मानपान केला नाही म्हणून सासरच्या लोकांकडून होत असलेल्या छळाला कंटाळून जैनवाडी (ता. पंढरपूर) येथील एका विवाहितेने गळफास घेऊन आत्महत्या केली आहे. पूजा महेश लिंगडे (वय 21, रा. जैनवाडी) असे विवाहितेचे नाव आहे. सोमवारी (ता. 10) सकाळी तिने आत्महत्या केल्याचे समोर आले. याबाबत पंढरपूर ग्रामीण पोलिस ठाण्यात सासरच्या चौघांविरोधात गुन्हा दाखल करण्यात आला आहे. 

हेही वाचा : पंढरपुरात सहाय्यक पोलिस निरीक्षकाचा अपघाती मृत्यू 

पूजा हिचा विवाह तीन वर्षांपूर्वी जैनवाडी येथील महेश लिंगडे याच्याशी झाला होता. तेव्हापासून तिला स्वयंपाक येत नसल्याच्या कारणावरून आणि मानपानावरून त्रास दिला जात होता. या त्रासाला कंटाळून पूजा मागील काही दिवसांपासून कासेगाव (ता. पंढरपूर) येथील आई-वडिलांकडे राहात होती. परत सासरी नांदायला जायला तयार नव्हती. मात्र पती महेश याने फोनवरून "पूजाला आजच्या आज पाठवा, नाहीतर परत नांदवणार नाही' असा निरोप दिल्याने भाऊ चैतन्य, आई व मामा यांनी मुलाबाळांसह पूजाला सासरी नेऊन सोडले होते. त्याच दिवशी पुन्हा संध्याकाळी पूजाला मारहाण झाल्याचा फोन आला होता. परंतु सकाळी बघू, असे म्हणून पूजाच्या माहेरच्या लोकांनी समजूत काढली होती. दुसऱ्या दिवशीच 12 वाजता पूजाने गळफास घेऊन आत्महत्या केल्याची माहिती माहेरच्या मंडळींना कळाली. घटनेचा तपास पोलिस निरीक्षक प्रशांत भस्मे करीत आहेत. 

संपादन : श्रीनिवास दुध्याल