कराड-पंढरपूर रस्त्यावर दुचाकींची समोरासमोर धडक; तिघेजण जागीच ठार तर दोघांची प्रकृती चिंताजनक

महूद (सोलापूर) : कराड-पंढरपूर रस्त्यावरील चिकमहूद (ता.सांगोला) हद्दीतील बंडगरवाडी पाटीजवळ शनिवारी दुपारी बारा वाजण्याच्या सुमारास दोन दुचाकी यांची समोरासमोर धडक झाली. त्यानंतर ट्रॅक्टर दुचाकीवरुन गेल्याने झालेल्या अपघातात पंढरपूर तालुक्यातील आजोबा-नातू सह सातारा जिल्ह्यातील एक वयस्कर महिला असे तिघेजण ठार झाले आहेत. तर इतर दोघांची प्रकृती चिंताजनक आहे. 

सोलापूरच्या बातम्यांसाठी येथे क्लिक करा 

पंढरपूर तालुक्यातील कासेगाव येथील भगवान रामचंद्र पडवळकर (वय ७०) हे आपला नातू अक्षय बंडू पडवळकर (वय २०) याचे सोबत एम.एच.१३ डी.सी.०३९७ या दुचाकी वरून पौर्णिमेनिमित्त खरसुंडी (ता.आटपाडी,जि.सांगली) येथे देवदर्शनासाठी निघाले होते. तर देवापूर (ता.माण,जि.सातारा) येथील अरुण भगवान कांबळे (वय ५०), रोहित अरुण कांबळे (वय १७) व मुक्ताबाई भगवान कांबळे (वय ७५) हे तिघे एम.एच.४२, एस. ५८१० या दुचाकीवरून सांगोला तालुक्यातील महीम येथे कावीळ या आजारावरील आयुर्वेदिक औषध उपचार घेण्याकरीता निघाले होते.

पेहे ग्रामपंचायतीवर परिचारक गटाची 25 वर्षाची सत्ता कायम

ही दोन्ही दुचाकी वाहने चिकमहूद हद्दीतील बंडगरवाडी पाटीजवळ आली असताना त्यांची समोरासमोर धडक झाली व पंढरपूरच्या दिशेने चाललेला ट्रॅक्टरचे चाकही कांबळे यांच्या दुचाकीवरून गेले. यामुळे ही दुचाकी अक्षरशः दुमती झाली आहे. तर दोन्ही दुचाकी एकमेकापासून दूरवर जाऊन पडल्या होत्या. मुक्ताबाई भगवान कांबळे या रस्त्याच्या मधोमध फेकल्या गेल्या तर इतर चौघेजण रस्त्याच्या कडेला फेकले गेले. एकाच वेळी पाच जण रस्त्यावरती रक्ताच्या थारोळ्यात पडले होते.

ताज्या बातम्यांसाठी डाऊनलोड करा ई-सकाळचे ऍप  

दोन्ही दुचाकीवरील पाच जणांना जोरदार मार लागल्याने सर्वत्र रक्त सांडलेले दिसत होते. या अपघातात कासेगाव (ता. पंढरपूर) येथील भगवान रामचंद्र पडवळकर (वय७०) व त्यांचा नातू अक्षय बंडू पडवळकर (वय २०) याचा मृत्यू झाला. तसेच सातारा जिल्ह्यातील देवापूर (ता. माण) येथील मुक्ताबाई भगवान कांबळे (वय ७५) यांचाही मृत्यू झाला आहे. तर त्यांच्या सोबत असणारे अरुण भगवान कांबळे (वय ५०) व रोहित अरुण कांबळे (वय१७) यांची प्रकृती चिंताजनक असून त्यांच्यावर पंढरपूर येथील खाजगी रुग्णालयात उपचार सुरु आहेत.

अपघात घडल्यानंतर स्थानिकांनी तात्काळ १०८ क्रमांकावर संपर्क करून रुग्णवाहिका बोलावली व जखमींना ताबडतोब पंढरपूर येथील रुग्णालयात दाखल केले. रात्री उशिरापर्यंत या अपघाताची नोंद सांगोला पोलिसात झालेली नाही. पंढरपूर ते दिघंची हा रस्ता नव्याने तयार करण्यात आला असल्याने  वाहने अतिशय वेगाने जात आहेत. शिवाय काही ठिकाणी अतिशय धोकादायक वळणे असल्याने या ठिकाणी वारंवार अपघात होऊन अनेकांना आपले प्राण गमवावे लागले आहेत.