पंढरपुरात गॅसचा स्फोट, मोटारसायकल जळून खाक; सुदैवाने जीवित हानी टळली

पंढरपूर (सोलापूर) : पंढरपूर शहरात आज बुधवारी (ता. 12) दुपारी बेकायदेशीरपणे गॅस भरताना गॅस टाकीचा स्फोट झाला. यामध्ये पत्र्याची खोली जळून खाक झाली. ही घटना शहरातील महात्मा फुले चौकात घडली. शहराच्या मध्यवस्तीत गॅसचा स्फोट झाल्याने मोठी खळबळ उडाली आहे. 

हेही वाचा : सासरच्या त्रासाला कंटाळून जैनवाडीत विवाहितेचा मृत्यू 

एका टाकीतून दुसऱ्या टाकीत गॅस भरताना हा स्फोट झाल्याची माहिती आहे. या स्फोटामध्ये एक मोटारसायकल जळून खाक झाली आहे. चौकातील एका पत्र्याच्या खोलीत बेकायदेशीरपणे गॅस भरत असताना हा स्फोट झाल्याची प्राथमिक आहे.

स्फोट झाल्यानंतर अग्निशमन दलाच्या जवानांनी तत्काळ घटनास्थळी धाव घेऊन वेळीच आग विझवली. वेळीच आग विझवल्याने जीवित हानी टळली. स्फोट झाल्यानंतर पोलिस घटनास्थळी दाखल झाले आहेत. गॅस स्फोट प्रकरणी पोलिसांनी तपास सुरू केला आहे. 

संपादन : श्रीनिवास दुध्याल