बेळगाव : जोरदार पाऊस; नैऋत्य रेल्वे अलर्ट

बेळगाव : नैऋत्य रेल्वेअंतर्गत कॅसलरॉक ते कुलेमदरम्यान घाट भागामध्ये वारंवार पावसाळ्यात दरड कोसळण्याच्या घटना घडतात. याबाबत नैऋत्य रेल्वेने खबरदारी घेतली आहे. गत जुलै महिन्यात ड्रोन कॅमेऱ्याद्वारे रेल्वेचे सर्वेक्षण केले होते. त्यानंतर अनेक उपाययोजना हाती घेतल्या आहेत. दोन दिवसांपूर्वी बेळगाव-अनमोड महामार्गावर दरड कोसळण्याची घटना घडली. याची दखल घेऊन नैऋत्य रेल्वेने रेल्वे मार्गावरील उपाययोजनाही कडक केल्या आहेत. संभाव्य धोका टाळण्यासाठी ही खबरदारी घेतली जात आहे.

जोरदार पावसामुळे अनमोड घाटातातील दुधसागर मंदिराजवळ सोमवारी (ता. ४) दोन ठिकाणी दरड कोसळली होती. त्यामुळे रामनगर गोवा महामार्ग वाहतुकीसाठी चार तास बंद होता. तसेच बससेवाही विस्कळीत झाली होती. महामार्ग असो वा रेल्वेमार्ग, घाटात दरड कोसळण्याच्या घटना वारंवार घडत असतात. कॅसलरॉक ते कुलेमदरम्यानचा परिसर पश्चिम घाटामध्ये मोडतो. या ठिकाणी मोठ्या प्रमाणात पाऊस पडतो.

दरम्यान, येथे सिंगल लाईन रेल्वे कनेक्टिव्हिटी आहे. रस्त्यावरील संपर्क नाही. सुमारे २७ किलोमीटरचा हा घाट (ब्रागांझा घाट) सेक्शन आहे. पावसाळ्यात या ठिकाणी लॅन्ड स्लाईड होते. याची पाहणी वारंवार केली जात आहे. या ठिकाणी लँन्ड स्लाईड होऊ नये यासाठी प्रतिबंधात्मक उपाययोजना आखण्यात आल्या आहेत. अतिरिक्त सुरक्षेची उपाययोजना म्हणून ड्रोन कॅमेऱ्याने सर्वेक्षण करण्यात आले होते. यामुळे धोकादायक ठिकाणांची माहिती मिळण्यास मदत झाली. या मार्गावर पायी चालून वारंवार सर्वेक्षण केले जात आहे.

यानंतर ज्या ठिकाणी गरज आहे तेथे सिमेंटची भिंत बांधण्यात आली आहे. दरड कोसळणार नाही, याची काळजी नैऋत्य रेल्वे घेतली आहे. पावसाळ्यात खबरदारी म्हणून घाट विभागात याआधीच वाळूच्या पिशव्या, दगड व इतर साधने कॅस्टलरॅक, कुलेम व तिनईघाट येथे तयार ठेवण्यात आली आहेत. कॅसलरॉक ते कुलेमदरम्यान अतिरिक्त कर्मचारीही तैनात केले आहेत.

पावसामुळे नैऋत्य रेल्वेकडून घाट विभागात खबरदारी घेण्यात आली आहे. नाईट पेट्रोलिंग केले जात आहे. कॅसलरॉक ते कुलेमदरम्यान अतिरिक्त कर्मचारी तैनात केले आहेत. संभाव्य धोका टाळण्याच्या विविध उपाययोजना केल्या आहेत.

- अनिश हेगडे, मुख्य जनसंपर्क अधिकारी, नैऋत्य रेल्वे