नेपाळहून परतले 28 जण; एक सांगलीतील रुग्णालयात

सांगली ः नेपाळला सहलीला गेलेले सांगली आणि कोल्हापूर जिल्ह्यातील 28 लोक आज परतले. कवठेमहांकाळ तालुक्‍यातील नागज येथे फाट्यावर तपासणी सुरु असताना अचानक प्रवासी बस दत्त म्हणून हजर झाली.

प्रशासनाची एकच तारांबळ उडाली. त्यातील एक प्रवाशाला खोकला अधिक प्रमाणात होता. त्यामुळे त्याला तत्काळ सांगलीतील शासकीय रुग्णालयात दाखल करण्यात आले. अन्य प्रवाशांच्या हातावर शिक्का मारून त्यांना "घरीत थांबा', असे सक्तीचे आदेश देण्यात आले.

याबाबत महापालिका प्रशासनाकडून मिळालेली अधिक माहिती अशी ः सांगली आणि कोल्हापूर जिल्ह्याती 28 लोकांना घेऊन तीर्थक्षेत्र दर्शन घडवण्यासाठी केलेली बस आज दुपारी नागज फाटा येथे आली. त्या ठिकाणी लोकांनी पर्यटन व तीर्थक्षेत्र दर्शनासाठी गेल्याचे सांगितले. त्यावर तेथील अधिकाऱ्यांनी त्यांची प्राथमिक तपासणी करून हातावर शिक्के मारले. त्यांना पुढील 14 दिवस घरीच थांबा, असे आदेश दिले. ही बस मिरजेत आल्यानंतर महापालिका उपायुक्त स्मृती पाटील यांनी वाहनाची तपासणी केली. लोकांशी संवाद साधला.

त्याआधी मिरज शहरातील आठ लोक त्यांच्या घरी रवाना झाले होते. त्यांचे संपर्क क्रमांक मिळवून त्यांच्याशी संपर्क करण्यात आला. या लोकांना पुढील 14 दिवस घरातून बाहेर पडू नका, वैद्यकीय यंत्रणा सतत संपर्कात राहील, असे सांगण्यात आले. त्यापैकी एकाला खोकला असल्याने तत्काळ शासकीय रुग्णालयात दाखल करण्यात आले. त्यानंतर उर्वरीत प्रवासी कोल्हापूरच्या दिशेने रवाना करण्यात आले. तेथे त्यांची तपासणी करून 14 दिवसांसाठी घरातच थांबवण्यात येणार आहे.

पोलिस उपाधीक्षक संदीपसिंह गील यांनी संबंधित प्रवासी वाहतूक यंत्रणेला खडसावले. इतके दिवस नेपाळमध्ये फिरून आले आहात, त्याची माहिती प्रशासनाला का दिली नाही, असा जाब त्यांनी विचारला.

""नागज फाट्यावर झालेल्या तपासणीनंतर या लोकांच्या हातावर शिक्के मारले आहेत. पूर्ण दक्षता घेतली जात आहे. अशा पद्धतीने कुणी बाहेरून आले असेल तर प्रशासनाशी संपर्क साधला पाहिजे.''

उपायुक्त स्मृती पाटील