तवंदी घाटात झालेल्या अपघातात एकजण जागीच ठार

निपाणी : भरधाव जाणाऱ्या दोन ट्रकची समोरासमोर धडक होऊन एकजण जागीच ठार झाला असून एकजण गंभीर जखमी झाल्याची घटना घडली आहे. आज पहाटे राष्ट्रीय महामार्गावरील तवंदी घाटात हा अपघात झाल आहे. मोहम्मद एम. जलील (वय ३५, रा. मोरवा आनंदपूर, उत्तर प्रदेश) असे गंभीर जखमीचे नाव असून त्याच्यावर येथील गांधी रुग्णालयात प्रथमोपचार करून अधिक उपचारासाठी कोल्हापूरातील सीपीआर रुग्णालयात दाखल केले आहे. 

अपघाताबाबत घटनास्थळासह पोलिसांकडून मिळालेली अधिक माहिती अशी, बेळगाव येथून प्लायवुड भरून ट्रक (जीजे २५ यू ४१४९) कोल्हापूरच्या दिशेने निघाला होता. त्याचवेळी कोल्हापुरकडून संकेश्वरकडे मालवाहू ट्रक (एमएच ०९ सीडब्ल्यू २८०९) जात होता. पहाटे सहा वाजता तवंदी घाटातील दुसऱ्या वळणावर ट्रकचालक मोहम्मद जलीलचा वाहनावरील ताबा सुटून समोरून दुसऱ्या बाजूने येणाऱ्या ट्रकला जोराची धडक दिली. या अपघातात ट्रक चालक जागीच ठार झाला. दुसऱ्या ट्रकमधील मृताची ओळख पोलिस पटवित आहेत.

हेही वाचा - भाजपला द्यावी लागणार मोठी झुंज ; राष्ट्रवादीची चूल मात्र वेगळीच ? -

या अपघातात जखमी झालेल्या मोहम्मदला तात्काळ रुग्णवाहिकेतून गांधी रूग्णालयात उपचारासाठी दाखल केले. मात्र त्याच्या पोटाला गंभीर दुखापत झाल्याने प्रथमोपचार करून कोल्हापूर येथील सीपीआर रुग्णालयात हलविले. या अपघातात दोन्ही ट्रकचा चक्काचूर झाला आहे. अपघाताची माहिती मिळताच शहर पोलिस ठाण्याचे उपनिरीक्षक अनिलकुमार कुंभार, हवालदार एस. एस. चिक्कोडी व सहकाऱ्यांनी घटनास्थळी भेट देऊन ट्रकमध्ये अडकलेला ट्रक चालकाचा मृतदेह क्रेनच्या सहाय्याने बाहेर काढला.

अपघातानंतर राष्ट्रीय महामार्गावर वाहतुकीची कोंडी झाली होती. त्याची दखल घेऊन जयहिंद कंपनीच्या भरारी पथकाने वाहतूकीची कोंडी कमी करून वाहतूक सुरळीत केली. आठवड्याभरात तवंदी घाट परिसरात तिसरा मोठा अपघात झाल्याने प्रवाशातून भीती व्यक्त होत आहे.

हेही वाचा - पत्नीकडे पाहून हॉर्न वाजवतात म्हणून चारित्र्याच्या संशयातून पतीनेच केली मारहाण -

संपादन - स्नेहल कदम