मांगूर (बेळगाव) : कुन्नूर-मांगूर रस्त्यावर गोदाई ओढ्यानजीक झालेल्या अपघातात मालवाहू ट्रक व उसाच्या ट्रॅक्टरचा अक्षरशः चक्काचूर झाला. मंगळवारी मध्यरात्री ही घटना घडली. त्यात सुदैवानेच चालक बचावले.
याबाबत अधिक माहिती अशी, मांगूरहून कुन्नूरच्या दिशेने मालवाहू ट्रक (एमएच 46 बीएफ 0784) व आडीहून हुपरी येथील जवाहर साखर कारखान्याकडे उसाच्या कांडीने भरलेली ट्रॅक्टर-ट्रॉली (केए 19 टी 7307) निघाली होती. त्यांच्यात झालेल्या जोरदार धडकेत ट्रॅक्टर-ट्रॉलीचा चक्काचूर होऊन ट्रकचेही मोठे नुकसान झाले. या अपघातात ट्रकचा चालक जखमी झाला आहे. या धडकेत रस्त्याकडेला असलेल्या लोखंडी बाजूपट्ट्या तुटून ट्रॅक्टरला जोडलेल्या दोन्ही ट्रॉली 15 फूट खोल ओढ्यात पडल्या. ट्रॉलीतील उसाच्या कांड्या सर्वत्र विस्कटल्या. या अपघातात ट्रॅक्टरचेही नुकसान झाले आहे. उशिरापर्यंत ग्रामीण पोलिस ठाण्यात अपघाताची नोंद झाली नव्हती.
अपघाताचे दृश्य भीषण
कुन्नूर-मांगूर रस्त्यावर झालेल्या अपघाताचे दृश्य भीषण होते. इतका मोठा अपघात होऊनही दोन्ही वाहनातील चालक सुखरूप आहेत. दैव बलवत्तर म्हणून जीवितहानी झाली नसल्याची चर्चा परिसरात सुरू होती.
रस्ता रुंद पण, अपघातांची मालिका कायम
कुन्नूर-मांगूर रस्त्यावरील गोदाई ओढ्यानजीक गेल्या तीन वर्षात त्याच ठिकाणी बाराहून अधिक लहान-मोठे अपघात झाले आहेत. वर्षभरापूर्वी या ठिकाणी रस्ता अरुंद होता. सध्या रस्ता रुंदीकरण होऊन बाजूला लोखंडी कठडे असूनही आता पुन्हा अपघात होत आहेत. याला जबाबदार वाहनधारकच आहेत, याचीही चर्चा परिसरात सुरू होती.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
